الاثنين، 23 مايو، 2011

30 سؤال في نقد المجلس العسكري..زنزانتي فين؟

من قبل أي حاجة أنا خايف أتسجن بسبب أسئلتي مع إنها أسئلة مجردة ولا تحريضية ولا حاجة ... شفتوا وصلتونا لأيه ؟ 


 
أنا بس بسأل يا مجلس

1-        طالما كنتو ناويين تعملو إنقلاب ليه مطلعتوش مع الشعب من يوم 25 وأنقذتوا اللي كانو بيموتوا واللي بيتضربوا وخلصتونا بدري بدري من وجع القلب ده ؟
2-        أنا مواطن عادي ومقبلهاش علي نفسي إن أمريكا تقول إن مساندة جيش مصر للثوار كان بسبب دعم أمريكا للجيش المصري ماديا وفكريا في الفترة اللي فاتت ... أين كرامة الجيش المصري ؟ أين الرد علي هذا الإدعاء ؟
3-        ليه رسائل المجلس كلها بتصر علي عدم وجود معتقلين في حين إن كل شوية تفرجوا عن معتقلين جداد ؟
4-        ليه طالما إنتوا معترفين بالثورة وإنها في صالح الشعب مش بتعالجو مصابين الثورة علي نفقة الجيش وفي مستشفيات عسكرية ؟ أو حتي حكومية ؟ ليه سايبين ناس منهم مرمية مش لاقية اللي يصرف علي علاجها ؟ وليه مبارك وسوزان بيتعالجو في شرم الشيخ بالمجان ؟ (بحسب وكيل وزارة الصحة )
5-        ليه إنسحبتوا بالشكل ده من الشوارع والميادين وسبتوا الشرطة محتاسة وكل يوم بلطجية وحرايق ودمار ؟
6-        ليه عارفين تراقبو النت وتجيبوا المدونين المحرضين ( علي حد تعبيركم ) وسايبين المحرضين بإسم الدين زي (الزغبي وأبو أنس ) اللي في دلائل لا تقبل الشك علي تحريضهم ؟
7-        ليه متنفذش قانون منع التظاهر أمام دور العبادة بحق اللي تظاهرو قدام كنيسة عين شمس ؟
8-        فين دور المخابرات الحربية والمخابرات العامة في إنها تجيب بطرس غالي مثلا ( مرضتش أقول حد غيره بس هما كتير )
9-        ليه يوم الجمعة اللي فاتت كنتو بتلمو توقيعات تأييد ليكم ؟ للدرجادي حاسين إنكم فقدتم شرعيتكم ؟
10-        ليه إستدعيتوا شيوخ سلفيين عشان بيحرضوا علي هدم تمثال عبد الناصر بسوهاج ومستدعيتوش الزغبي وأبو أنس عشان حرضوا علي حرق وإقتحام الكنائس ؟
11-        الثورة قامت عشان الحرية وإنتو بحسب كلامكم دعمتو الثورة ليه بقي جرمتو نقد المجلس العسكري ؟ دي تعتبر حرية برضه ؟
12-        مش معقولة إحنا كشعب عادي أذكي وأقوي منكم لكن بذكائنا البسيط وإمكانياتنا المحدودة عارفين إن مش العيال البلطجية هما السبب في اللي بيحصل من بلطجة لكن وراهم إبراهيم كامل اللي خرجتوه و زكريا عزمي اللي خرجتوه وحسين سالم اللي مش عايزين تجيبوه ؟
13-        ليه العيال اللي مسكناهم في معركة الجمل متحاكموش ؟ سيبكم من مين اللي باعتهم دلوقتي لكن هما فين ؟ دا إحنا مسلمينهم للجيش بإدينا  
14-        ليه السجون بيخرج منها المجرمين وبيخشها مدونين ؟ وليه مايكل نبيل دخل السجن في عهدكم إنتو مش في عهد مبارك مع إنه بيتكلم من زمان ؟
15-        ليه بيتطبق القانون علي المدونين والكتاب ومبيتطبقش عالإخوان اللي يفطهم اللي مليانة ترويج للسياسة بإسم الدين مع إن القانون بيجرم ده ؟
16-        ليه قانون ممارسة الحقوق السياسية نزل بدون إستفتاء عليه ؟
17-        ليه المصريين بالخارج يتقبل تبرعاتهم وميتقبلش أصواتهم ؟
18-        ليه اللواء أسماعيل عتمان بيتهمنا إننا عملاء وقابضين ( بحسب بثينة كامل ) وليه لو هي بتكذب منفيتوش ده ؟
19-        ليه متقبضش علي ناس زي طلعت زكريا وغيره بتهمة إهانة الثورة والثوار ( بإعتبار إن المجلس العسكري إعترف بشرعية الثورة قبل كدة )
20-        ليه مصدرتش أحكام علي عملو كشف عذرية للبنات ؟ وليه لو دي إشاعة لتلطيخ إسم المجلس ليه بقي مجبتوش اللي طلعها ؟
21-        يعني إيه اللواء ممدوح شاهين يقولنا إتفرجوا عالجيش في ليبيا بيعمل إيه في الشعب !!!!!!!!!!! بيزلنا ؟ ولا نسي هو وظيفته الأساسية إيه ؟
22-        فين الرائد أحمد شومان ؟ إتحاكم ؟ أعدم ؟ بيتعزب ؟ ذكائي المتواضع يقول إن يطلع في الإعلام يوضح الموقف ويهدي الرأي العام لو الجيش معملوش حاجة فعلا .... لكن التستر عليه بالشكل ده يقول إن في حاجة غلط
23-        فين الظباط اللي إتقبض عليهم في إعتصام 9 مارس ؟ لو خونة ومزورين كارنيهاتهم يتحاكمو ... لكن لو مش خونة هما فين ؟
24-        إنتو صعبانين علي ... أه بجد ... كان ممكن تخشوا التاريخ من أوسع أبوابه ... لكن للأسف هتخشوا التاريخ لكن في زخنوق اللي حاولو يضحكو عالثورة
25-        لما طلعتوا مع مني الشاذلي أنا كنت طاير من الفرحة وكتبت ملخص لحواركم وقلت أنا بحب الجيش لكن للأسف أنا بحب الجيش بس بكره المجلس العسكري ... وأدي لينك ملخص حواركم وشوفو إنتو عملتو إيه من اللي قلتوه .... ساعتها قلتوا إحنا لسة ماسكين البلد مبقالناش 15 يوم ... دلوقتي بقالكم 3 شهور ... وبرضه معملتوش حاجة http://shwytklam.blogspot.com/2011/02/blog-post_5632.html
26-        للأسف إنتو صعبانين علي لأن إستخدمتو نفس سياسة مبارك ومتعلمتوش الدرس ... بتحاربوا حماسنا بنفس الطريقة : إشاعات ، إشعال فتن لمحاولة تشتيت المطالب ، تباطؤ تباطؤ تباطؤ وصل لحد التواطؤ
27-        للأسف أخدتونا عليكم ... لقيناكم مبتتحركوش غير بالمليونيات
28-        للأسف صعبانين علي لأنك تنتموا لجيل العواجيز اللي لسة فاكر إن جيلنا تافه وميقدرش يعمل حاجة ... لسة مأدركتوش إن زلاتكم و إخفاقاتكم بقت منتشرة في كل مكان ... لسة فاكرين إن شوية العيال السيس بتوع النت ميقدروش يعملو تغيير في البلد ... هو إنتو محضرتوش الثورة ولا إيه ؟
29-        ليه بتحرجوا الجيش وتحطوه في موقف زفت مع الشعب ؟ الشعب اللي داق رصاص الأمن المركزي والداخلية لا يمكن يخاف من أي رصاص تاني ولا يخاف من معتقلات تاني وإستحالة يتنازل عن ثورة بدأها ومكملهاش ونازل يواجه مجلس عسكري
30-        ليه تقبضوا علي وأتحاكم لمجرد إني بسألكم مجرد أسئلة ؟


وبرضه نحب ننوه إن الجيش والشعب إيد واحدة

هناك 27 تعليقًا:

  1. انا هتكلم عن هجومك علي الاخوان و المسلمين و الشيوخ فقط ، ليه حضرتك مسمعتش ان في اخت كانت محتجزه فعلا و كلام موثوق منه ؟ ليه حضرتك مشوفتش مسبيرو ولا حضرتك مش بتشوف غير المسلمين ؟ ليه حضرتك اتكلمت عن الشويخ و متكلمتش علي الي قتل 12 مسلم في امبابه ؟ حضرتك مشوفتش القاسوسه قالوا ايه في المسبيرو ؟ مسمعتش عن طلب النصاري احتلال مصر ( الحمايه الدوليه ) ؟ ليه متكلمتش عن شنودهالي كان بيقول محدش من شعب الكنيسة يشارك في الثوره ؟ و فعلا الي نزل من النصاري عدد محدود جدا جدا جدا و معظمهم من الكنيسة الانجيليه ؟ انت مش شايف بئا غير المسلمين علي غلط بس و طنشت علي قتل الاخت سلوي هي واطفتها و زوجها
    الجيش ماشي كويس جدا
    و انا مع القوات المسلحة في قراراتها
    القوات المسلحة الي وقفت مع الثوره لم تضربها كما فعلت الداخلة
    الرحمة شويه ارحموا مصر من المظارهات و الاعتصامات
    سؤال اخير ليه نزلين يوم الجمعو ما السبت اجازه بردو ؟؟
    السلام عليكم و رحمة الله
    nuor mytopm علي الفيس بوك

    ردحذف
  2. للأسف كل الأسئلة غريبة و عجيبة و ليس لها أي داع و ليست عند كل الناس
    نرى أن المجلس العسكري على حق في كل تصرفاته و أنه بالفعل ساند الثورة و حماها بحق و أن جيش مصر هو جيش مصري أصيل تحمل كل المشاق و الصعاب و لم يتوان لحظة في حماية مصر بجميع طوائفها و إذا استعان بالحكماء لحل المشاكل فهذه قمة المصرية و الانتماء و إذا صبر على المحرضين و البلطجية فهذه قمة الحكمة و الذكاء و إذا تجاهل كل إساءاتكم و ادعاءاتكم فهذا قمة النبل و الأبوة و الجمال و لم الشمل لهذا الوطن -- يا ريت نحافظ على بلدنا و ننتظر الانتخابات بأمان و الصناديق أصبحت قمة في النزاهة و الاحترام و الر ئيس تنحى و كانت أهداف الثورة الحقيقية المصرية هي عدالة اجتماعية و حرية و جديمقراطية فدعونا نعيش حياتنا و ننتظر انتخاباتنا بسلام و نبني مصرنا بسلام بدون خسائر أخرى -- و لنتق الله في وطننا و نلم شمل أسرتنا المصرية فلا لعراق مشتت و لا لسودان مقسوم

    ردحذف
  3. انا مش فاهم انت بتهاجم الاخوان ليه ومش بتهاجم القساوسه اللى كانو عايزينا حمايه الاجانب!!!!!!!!
    وبالنسبه للنقطه رقم 17 المجلس طلع قرار كدب فيه الكلام ده وقال ان اصواتهم مقبوله كمان
    وفعلا المجلس والجيش وكل مكان فى مصر محتاج ينظف وعشان كده نازلين تانى والله الموفق

    ردحذف
  4. كلها اسئلة مشروعة

    ولكن ما أخشاه هو مايترتب على جمعة الغضب القادمة التي تدعو لها بعض القوى السياسية
    من وجهة نظري وايضيا أرى ان عملية الإصلاح من قبل الجيش تمر ببطء شديد وان هناك تساؤلا كثيرة تؤخذ عليه على سبيل المثال إصدار بعض القوانين الغير مرضية لجموع الشعب على سبيل المثال قانون الأحزاب الجديد وغيره من القوانين مثل الممارسة السياسية وايضيا
    لماذا لايصدر الجيش بما انه المفوض لادراة شئون البلاد قوانين وتشريعات نقدر نحاسب بيها النظام السابق نريد قانون يحاسب على الفساد السياسى حتى قانون الكسب غير المشروع به قصور واضح لم يعدل التي اقتصرت بعض المحاكمات على أساس مارتكبوه من فساد مالي ولكن السياسي هو الأهم كما صدر قوانين لملاحقة البلطجة وسرعة محاكمتهم وايضيا نريد قوانين لمحاسبة النظام المخلوع وايضيا سرعة محاكمته
    أرى ان المجلس الأعلى يمسك العصا من المنتصف بمعنى انه لايخفى ان بعض قيادات المجلس العسكري هى من ضلوع النظام السابق وهذا واضح وضوح الشمس في محاكمة الرئيس السابق على الأقل ومدامه سوزان هانم وايضيا هو مع الشعب باانه لم يرضى بقتل مواطن مصري أيام الثورة ونحن نقدر له ذلك ولكن نريد أكثر وأكثر حتى نمر بهذه المرحلة الراهنة والعصيبة على كل مصري فعجلة الإنتاج بداءت تتعطل حقيقتا
    وحكومة الدكتور عصام شرف عليها بعض الملحوظات وايضيا أرى ان معظم الوزراء من المسنين الغير متفاعلين مع الوضع الراهن وهذا لايقلل من مجهودهم وإخلاصهم ولكن هناك طاقات أكثر ايجابية وحيوية وتفاعلا مع الأوضاع يجب الاستفادة منهم في الفترة القادمة
    ماذا حققت حكومة شرف على ارض الواقع فهي غير مسئولة عن إصدار القوانين والتشريعات التي تصدر من المجلس الأعلى غير التصريحات فقط
    ثانيا لاتسطيع ان تدير حوارا مجتمعيا على مستوى بحيث يعبر عن رغبتنا في اختيار ما يناسبنا في المرحلة المقبلة هذه كارثة في حد ذاتها
    ولا أريد ان القي بالكاهل كله على الجيش والحكومة ولكن نحن كمواطنين لابد وان يكون لنا دور ايجابي في إحداث التغيير التي نرتضيه وللإعلام الدور الأكبر في ابرااز ها الدور عن طريق إيجاد طرق حقيقية وفعالة في توعية المواطنين في التعامل مع كل شئ وخصوصا الأمن لأنه أولوية ملحة للعبور من الأزمة الراهنة

    ردحذف
  5. للأسف كل الأسئلة غريبة و عجيبة و ليس لها أي داع و ليست عند كل الناس
    نرى أن المجلس العسكري على حق في كل تصرفاته و أنه بالفعل ساند الثورة و حماها بحق و أن جيش مصر هو جيش مصري أصيل تحمل كل المشاق و الصعاب و لم يتوان لحظة في حماية مصر بجميع طوائفها و إذا استعان بالحكماء لحل المشاكل فهذه قمة المصرية و الانتماء و إذا صبر على المحرضين و البلطجية فهذه قمة الحكمة و الذكاء و إذا تجاهل كل إساءاتكم و ادعاءاتكم فهذا قمة النبل و الأبوة و الجمال و لم الشمل لهذا الوطن -- يا ريت نحافظ على بلدنا و ننتظر الانتخابات بأمان و الصناديق أصبحت قمة في النزاهة و الاحترام و الر ئيس تنحى و كانت أهداف الثورة الحقيقية المصرية هي عدالة اجتماعية و حرية و جديمقراطية فدعونا نعيش حياتنا و ننتظر انتخاباتنا بسلام و نبني مصرنا بسلام بدون خسائر أخرى -- و لنتق الله في وطننا و نلم شمل أسرتنا المصرية فلا لعراق مشتت و لا لسودان مقسوم

    ردحذف
  6. اسئله هامه جدا ومحتاجه اجابات .. ده لو احنا عاوزين مصر متقدمه فى المستقبل ..انما بالكام رد اللى شفتهم .. اقدر اقول وانا ضميرى مستريح العيب مكنش فى مبارك العيب فينا احنا .. احنا اللى اتعودنا على الذل والاهانه وممكن اى واحد معدى يستعبدنا عادى ونبوس ايده كمان .. يا ناس واحد فقط ربنا عصمه من الخطء وهو سيدنا محمد اماباقى بنى ادم يؤخذ منه ويرد عليه ومن حق الجميع لو شاف اى حد فيهم اى حاجه غلط ومش معنى كده انه يبقى خاين او عميل او حمار او غبى .الحاكم اللى بيحكم عنده عقل وانا ربنا خلقلى عقل زيه مش فرده جزمه اللى فى جمجتى ده .يبقى اشمعنى قرارات الحكام معصومه من الخطاء ولا يجوز نقاشها ابدا ..امتى بقى نخلص من العقليه العبيده دى
    يا رب ارحمنا ..

    تحيتى لكاتب الاسئله فعلا مهمه وملحوظه جدااااااااااااا

    ردحذف
  7. الكلام كله صح للاسف (رغم احترامى الكامل للمجلس العسكرى وتقديرى لدورة )بس فعلا نا قص طلب تحقيق مع المحرضين من المسيحيين كمان
    عموما اعتقد ان الانتخابات لو تمت فعلا بنزاهه مع عودة القانون على الجميع كل شى هيتظبط بمرور الوقت

    ردحذف
  8. كلام زي الفل

    ردحذف
  9. لا اتفق معاك

    ردحذف
  10. اخى الكريم بفضل عظمة الجيش انت تكتب الان بهذه الطريقة يفوح من كلماتك رائحة النية غير السليمه والرغبة فى التشكيك فى الجيش العظيم الذى لولاه ماكنت انت موجود الان واسالك نفسك لو صادق من حمى مصر والمصريين والثورة غير الجيش دعنا لا نكون نكارين للجميل ومغرضين ونقول للجيش الف شكر ونريدكم بيننا على طوال حتى تسليم السلطة الى رئيس مدنى وليذهب المتأمرون الى الجحيم وتحيا مصر وجيشها العظيم

    ردحذف
  11. انا مش فاهم احنا عايزين نوصل البلد لفين طيب انا معاك في 30 سؤال ولكن أسمحلي وخليك ديموقراطي وضيف السؤال رقم 31 رأيكم ايه العمل بعد ما نسقط المجلشس العسكري ويا ترى شكل مصر ايه متقوليش ما احنا اسقطنا النظام مجتش على الجيش هقولك لأ الجيش هي أخر كارت موجود متقوليش مجلس بطيخي ورأسي ده احنا مش عارفين نعمل مجرد حوار وطني ونص الشعب عندك لسه بيدور في الصحره على كاملياه وجمالات وحسنيه أرجوك قدم روأيه موضوعيه وحقيقيه وواقعيه لمصر بعد الجيش الكارت الاخيــــــــــــــــــر وشكرا

    ردحذف
  12. انا عاوز اقول للاول تعليق يعني الدولة خلاص بقينا تمام واخر حاجة مبقاش الا لعبير و كامليا نروح نولع في البلد عشان واحدة يعني

    ردحذف
  13. و ايمن الجدامىاللى اتكلم عن الثوره قبل ماتحصل ومحدش لاقيو والناس البى سئلو وعملو وقفات اتقبض عليهم واتعذبو

    ردحذف
  14. معاك في كل كلمة

    ردحذف
  15. حلوة اوووووووي بجد كلنا لازم ننزل الجمعة الجاية لاسقاط المجلس العسكري واقامة مجلس رئاسي مدني

    ردحذف
  16. الجيش بيفكر ألف مرة قبل ما يصدر قرار لأنه الظروف ما تسمحش بأى خطأومش عاوز يغلط عشان ما يبقاش زى النظام السابق

    ردحذف
  17. انت عندك حق حتي ولو كانو مظلومين في هذه الاستنتاجات عملو اايه عشان يبرئوا نفسهم فين الشفافيه من يوم الثوره المفروض مافيش حاجه تتعمل في غرف مغلقه كل شئ المفروض يكون علي الهوا وبعدين لو في ناس بتلوم عليك انك ذكرت حاجات علي الاخوان ومذكرتش علي غيرهم ده مش معناه ان الاخوان صح ولا ان غيرهم برضه صح يعني هنا التعبير بيخص الكل اخوان وغيرهم كل الناس واذا كنت مركز علي المسلمين عشان ده الي يهمك صورتنا مش هنعد نتكلم عن مساوئ غيرنا الي يهمنا نصلح مساؤنا الاول وبعدين نتكلم علي غيرنابس انا معترضه علي نقطه محاكمه الناس الي كانت ضد الثوره من حق ماتقبلهمش تقاطعهم ماتحبهمش بس مش من حقك تحاكمهم لانه مش باديهم انهم اتلربوا علي عقليه زي ديه والابقي نحاكم اهلهم وجدودهم الي ربوهم كده وكل واحد حر في رايه

    ردحذف
  18. أنت مش عارف تقول ايه
    ولا سؤال مفهوم ودائما .
    أنت شيوعى ولا إيه ... ودائما ضد الاخوان والسلفيين وناسى عادل لبيب ..
    روح ذاكر وأبقى اتكلم

    ردحذف
  19. محدش خاربها غير الاخوان والسلفيين عندهم استعداد يولعوا في البلد واللي فيها مقابل السلطة وبيتاجروا بالدين لكن وطنية وحب البلد وكلام الافلام ده معندهمش خالص بس الشعل هيديهم على قفاهم كلهم لان البلد ملك الشعب مش فئة الاخوان صاحب التاريخ الاسود في الاغتيالات وتحريم كل حاجة و نسف دور المرأة والاقباط بس الشعب هيديهم على قفاهم

    ردحذف
  20. أقولك انا ليه !!
    الغلط فينا أحنا .. لأننا سيبنا الميدان .. ونسينا دم شبابنا .. نسينا الظباط اللى وعدناهم نحميهم
    احنا شعب أتعلم الجبن .. حتى واحنا اقوياء وشايفين قوتنا بتغير الكون
    للأسف لسه بيستخدموا خوفنا ضدنا
    ارجع وأقولك .. كنا عشرين ألف فى وسط الميدان والبلد كلها بتقول علينا مجانين .. وفى الاخر نزلوا رقصو
    الايام بينا .. وهينزلو يرقصوا تانى ..

    ردحذف
  21. well said

    ردحذف
  22. the People should not be afraid from their governments , Governments should be afraid from thier people - V -

    ردحذف
  23. انا معاك فى كل كلامك تعرف اه المشكله ان كل الى كانوا فى النظام وحتى قيادات الجيش كانوا بيتصرفوا باوامر السيد الرائيس ولما جتلهم السلطه على طبق من فضه ارتبكوا فى اخز القرارات وهما حتى قالوا مكنوش متصورين حجم هذا الفساد وفى نفس الوقت مش قدرين يعترفوا انهم عجزوا عن حل الازمه واحتواء الموقف تقدر تقول بقه عند الكبار او عدم ادراك خطوره الموقف او كبر انهم يقودروا حياه مدنه وهم من برعوا فى كر وفر المعارك

    ردحذف
  24. ممكن اعرف انتو عايزين تروحو بينا على فين ممكن اعرف طلب النصارى الحماية لصالح مين ممكن اعرف مين اللى اعطى للى ماتو لقب شهيد وهو كان بيجاهد ضد مين انتو نسيتو ان المؤمن لو رفع سلاح فى وش اى حد فألقاتل والمقتول فى ألنار لان الجهاد أبوابه واضحة ممكن تقولو لى ان الثورة عملت أيه لليوم يا بهوات إحنا بنتشد لتحت ممكن تبررو لى السرقة وألنهب والحرق مين اللى عملهم اوعو تقولو البلطجية لأنى شاهدت شباب جامعى بيكسر محال وبيحط فى جيبه ومتبصوش للى هجمو على كار فور لأن الى عملو كده سرقو شوية سكر او شاى او زيت تقدرو تقولو لى الناس دى زنبها ايه فى الغلاء والجوع اللى هما فيه وكل يوم اسمع دعاوى الناس البسيطة اللى مالهاش فى السياسة بيقولو الله يخرب بيت الثورة والعواطلية اللى عملو الثورة ولعوها اكتر ما كانت والعى منهم لله

    ردحذف
  25. كلامك يا لاري كله جميل وصحيح لكن ناقص ولازم تكمله والا هتهمك بالطائفية اولا اتهمت الاخوان بانهم بيروجو للسياسة بالدين كلامك سليم لكن في ناس تانية برضو بتستخدم نفس الاسلوب ليه مجبتش سيرتهم (الكنيسة القبطية)اتكلمت عن اعداء الثورة ورجال مبارك لكن سقط منك واحد مهم اوي كان دايما بيقول ان عصر مبارك هو العصر الذهبي وامر اتباعه بعدم الخروج في المظاهرات هو مش برضو كده دخل الدين في السياسة غريب امركم والله

    ردحذف
  26. مثلث اليمين الاسلامى وفلول النظام السابق بقيادة الرئيس محمد حستى مبارك ( وفشر على اللى يقول مخلوع )والمجلس العسكرى يد واحدة ضد الهوجه اللى حصلت فى 25 يناير ..
    اعتقد اننا بحاجة الى ثورة حقيقية بعد ان عرفنا من هم اعداء الثورة

    ردحذف
  27. من احلى المواضيع الي قراتها.

    ردحذف