الأربعاء، 14 ديسمبر، 2011

أدي اللي خدناه من الثورة …


 إحنا بنخرج ... بس خروجاتنا في الطبيعي بقيت من سجن ل مشرحة ل نيابة عسكرية لنيابة أمن دولة



كله بيلوم الناس اللي في التحرير ويلوم الثورة علي أي حاجة تحصله … وكأن الناس اللي شاركت في الثورة ولسة متمسكة بيها وبالتحرير عايشين في نعيم وفي كوكب تاني وبياكلوا رز بلبن مع الملايكة ويا عيني الناس اللي في البيوت هما بس اللي متضررين

لأ … أحب أقولكم إيه اللي خدناه من الثورة

-  إحنا بنخرج ... بس خروجاتنا في الطبيعي بقيت من سجن ل مشرحة ل نيابة عسكرية لنيابة أمن دولة

- بنتمشي في الشوارع ... بس الواحد مننا بقي يمشي بيتلفت حواليه وبيبص في المرايات ويحفظ العربيات اللي ماشية وراه وبيقلق قبل ما يرد علي أي رقم غريب

- بنسأل علي بعض ... وكل يوم بقيت تسمع عن واحد تعرفه أعتقل وإتهري ضرب وخدله كام غرزة وكام كسر وكام طلقة خرطوش ... وحاليا في المستشفي بيتعمله تحاليل ... ويبقي أقصي أمانيك ساعتها تعرف هو خارج متشال ولا ماشي علي رجليه

- بنتكلم مع بعض ... بس كلامنا بقي مختلف شوية .. من يومين واقف مع أصحابي بيتكلموا كل واحد منهم خدله كام خرطوشة علي كام مطاطي … هو ده بقي الحوارالطبيعي بتاعنا؟؟؟؟

- كاميرات وعدسات ولاب توبات بتتسرق وبتتقلب في أثناء الإحتكاكات أو فض الإعتصام أو الإعتقال

- علي فكرة بنخش الإمتحانات عادي وحياتنا مش واقفة ... ده حتي واحد صاحبي راح يمتحن في الكلية فا دكتور المادة شافه متعور قاله ده من التحرير ؟  ف صاحبي قاله أيوة راح الدكتور سحب منه الورقه وطرده وقاله خلي التحرير ينفعك

- واحد صاحبي تاني لقيوه لازق ستيكر مناهض للمحاكمات العسكرية للمدنيين راحوا منزلينه من الميكروباص ووقفوه ساعتين في مكان مش عارفه وتحقيق ولبش وفي الأخر طلعوه في شارع هو ميعرفهوش

- بنمشي في الشوارع زينا زي باقي الناس ... بس من أسبوعين في مواطن شرف مسكنا وشك فينا لأن كان معانا صاحبنا أبيضاني وعينيه ملونة وإفتكروه جاسوس أجنبي وبنهربه وإعتدوا علي واحد مننا وكسروله مناخيره

- بدل ما بنبعت لبعض قصائد شعر ومعايدات بقينا بنبعت لبعض شهادات حبس وإعتقال وتقارير وفاة و إلحقوني أنا أعتقلت . أنا مخطوف . أنا ممسوك

- البنات أصحابنا بيتعاكسوا بس وصلوا لمراحل متطورة شوية ...  تحرش جنسي وكشف عزرية

- قلق متبادل علي الأهل وعلينا …

- ده غير الأمراض اللي لبسناها كلنا من الغاز اللي بيتضرب علينا ومش عارفين نحدد هي إيه بالظبط ... شوية يقولوا غاز أعصاب وشوية يقولوا غازات مسرطنة وشوية يقولوا غازات سامة ... أهه كوكتيل عجيب عبال ما نحل مكونات الغاز نكون رحنا في شربة مياه ... ووسط كل ده الحكومة بتأكد إن الغاز غير ضار ومطابق للمعايير الدولية ... تخيل بقي تسمع تصريح زي ده وإنت راقد مفرهض علي سريرك مناخيرك بتنزل حاجات سودة وصاحبك تسمع عنه بيرجع دم وصاحبك التاني حلل طلعت كرات الدم البيضاء أقل من المعدل الطبيعي بتاعها بمراحل ... كانو بيرشوا علينا كالونيا بس إحنا قلوبنا رهيفة شوية ... شباب سيس بقي

- وعلي فكرة في ناس كتير مننا برضه شغلها واقف وعربياتهم إتسرقت وغيروا شغلهم عشان يبقي في أي مرتب ثابت
 
- متقوليش أمال إيه اللي بينزلكم تاني ... إسأل إنت نفسك إيه اللي بينزلنا تاني ... وخليك عارف إن كل اللي بيحصله حاجة من دي بيتمسك أكتر بقضيته ومش بييأس وفخورين جدا باللي بنعمله

- المقال ده مش شحاتة تعاطف أو صعبانيات ولا شوفوا قد إيه حلوين وبيضحوا عشان البلد ... مش مطلوب منك لايك ولا شير ولا تعاطف .. مطلوب منك بس تحس شوية وتقدر بدل ما تشتم وتقول يستاهلوا ... خليك فاكر إن سكوتك عن اللي بيحصل هو تأييد لكل ظالم إنه يكمل في إنتهاكاته

- حاجة أخيرة عايز أقولها ... معظم الشباب اللي بدأ الثورة ... واللي لسة مكمل لحد دلوقتي شباب متعلم ومعاه فلوس وعربيات وبيسافر برة ومعاه أي فون وبلاك بيري وبيسمع بوب مارلي وزياد رحباني وبيلبس نايكي وبيضرب جيل وبيشد عالسخنة وشرم في الويك إند ... يعني من الأخر مش ناقصه حاجة ... كان يقدر يكمل ويعيش زي ما هو ومبسوط ... لكن هما بيعملوا حاجة تانية وهي إنهم بيتضامنوا وبيدوروا علي حق الناس اللي معندهمش ده ... تفتكر ليه ؟

- عمرك فكرت إيه اللي ينزل بنت من بيتها تمسك ميكوجيل وقطن وشاش في التحرير تعالج في ناس متعرفهمش وسط الغاز والرصاص والتهديد بالحبس والتحرش ؟؟؟ إيه اللي يخليها تعمل ده في الوقت اللي في زيها بنات كتير بيروحوا الجيم ويقضوها علي منتديات القلوب الناعمة وبيحتفلوا بالبيرس داي بارتي بتاع البي إف إف ؟

- عمرك فكرت إيه اللي يخلي بنت تبقي شايلة في شنطتها قطن وشاش بدل الميكاب والأي لاينر ؟ عمرك فكرت في سبب يخليها تسيب خروجة عيد ميلاد صاحبتها في سيلانترو عشان تروح تزور أم واحد معتقل أو شهيد أو مصاب في منطقة شعبية ؟ عمرك فكرت في سبب يخلي بنت تنزل تقف قدام سجن طرة ولا نيابة عسكرية ولا محكمة أمن دولة عشان تتضامن مع ناس يمكن مقابلتهمش في حياتها ولا مرة بدل ما تروح الـ كولور فيستيفال ؟ عمرك فكرت في يعني إيه تبقي بتختار وهي نازلة إيه اللبس اللي ينفع تجري بيه لو الأمن أو الجيش جري وراها في نفس الوقت اللي أصحابها بيتناقشوا في طول الكعب اللي هتنزل بيه كل واحدة النهاردة ؟؟

- هقول إيه ولا إيه ؟؟ كفاية حرقة دم بقي إحنا ورمنا ....  

هناك 9 تعليقات:

  1. كلام صادق وخارج من القلب فعلا. اكتب اكتب اكتب ربنا معاك ويوفقك

    ردحذف
  2. ربنا يحميكم ويقدرنا علي مساندتكم

    ردحذف
  3. ربنا يحميكوا ويقدرنا علي مساندتكم يا جيل لم تري مصر مثله من قبل

    ردحذف
  4. يااااااااااااااااااااااااارب افرج عن مصر واحمى الثواااااااااااااار

    ردحذف
  5. اتمني ان كل الشعب يقرأ مدونتك -- بجد انت قولت الكلام الى نفسي اوصله للشعب كلو وخاصة حزب الكنبة وابائنا وامهانتنا -- ربنا يكرمك

    ردحذف
  6. انا بكيت لما قرات الكلام دا حقيقى من كل قلبى فخوره بكل شاب بيعمل شىء ومكمل وكل شاب مش عايز ظلم وعايز حريه وعداله احنا بجد تعبانين جدا من الظلم والفساد متتضايقيش من الناس الى بتشتم لانهم مش شايفين غير الى تحت رجليهم ولانهم بيفكروا فى انفسهم وبس . شكرا لانكم بتضحوا بانفسكم لاجلى ولاجل ابنى اشكرك جدا جدا على هذا المقال الرئع الى من القلب

    ردحذف
  7. ربنا يهديهم و ينور بصائرهم

    فعلا مش طالبين تعاطف إحنا طالبين ان محدش يوجع فينا بالكلام

    ردحذف
  8. انا وانت وغيرنا اللى مؤمنين باللى بنعمله نفهم الكلام ده
    إنما اللى مش عارف الكلام ده مش محتاج نشررحله
    كل حاجة باينة بس هو مش عايز يتكشف بالحقيقة قدام نفسه
    بعيد عنكم عندهم مجرد خطير ,, فقدوا انسانيتهم

    ردحذف
  9. Much respect!
    Nice words (:
    God bless you .

    ردحذف