حضرتك سبت الأخوان ومجلس الشعب والسلفيين والفلول و الجيوش و المماليك والأنجليز وقاعد تلوم المسيحيين أنهم باعوا دم الشهداء
معلش بس الواحد جواه بقين عايز يقولهم عشان موجة الأتهام وتلبيس العمة للمسيحيين من ساعة ما الناس عرفت أن شفيق بيتقدم في الأنتخابات ... بصوا بقي
- الكل كان عارف أن في تصويت لصالح شفيق وحشد من الوطني وثبت أن في تصويت لمجندين من الجيش ومن الشرطة لصالح شفيق ... وفي الأخر المسيحيين هما السبب ؟
- حزب الكنبة هما كتلة تصويتية كبيرة علي فكرة ، مش معني أنك مش بتشوفهم يبقي هما مش موجودين أو قليلين ... كتير كارهين الثورة ومن البداية ضدها ونفسهم يرجعوا مبارك وعشان كدة أختاروا شفيق ... وفي الأخر المسيحيين هما السبب ؟
- تعال نحسب كتلة المسيحيين الأنتخابية قد أيه .... لو هما 10 مليون ... نسبة اللي من حقهم المشاركة في الأنتخابات كام ؟ بالكتير قوي 4 مليون ... لو ال 4 دول نزلوا أستفتاء مارس اللي شارك فيه 18 مليون أكيد المسيحيين ساعتها قالوا ( لا ) يبقي النسبة حوالي الربع .. يعني المسيحيين لوحدهم 25% من اللي شاركوا ... حضرتك فاكر نسبة التصويت طلعت كام ؟ يبقي الموضوع برضه بيأكد أن في لعب بالأصوات والنتايج دايما مش حقيقية وكتلة المسيحيين الأنتخابية مش هي اللي علت شفيق قوي كدة
- حضرتك سبت الأخوان ومجلس الشعب والسلفيين والفلول و الجيوش و المماليك والأنجليز وقاعد تلوم المسيحيين أنهم باعوا دم الشهداء وباعوك يا مينا دانيال ، وسامحهم يا مينا دانيال ، وأهلك باعوك يا مينا مش أحنا !!!! الكلام ده بيثبت أنك متعرفش حاجة عن المسيحيين أصلا ... مش هكلمك عن اللي بيحصل في الصعيد والعشوائيات عشان محدش يقولي أنت طائفي وماسك في حجة أنكم مضطهدين ... لكن تخيل معايا واحد مسيحي أتحط في أختيار ما بين واحد لابس بدلة وشيك وبيضحك عليه وبيقوله أنا هحميك وواحد تاني جايله في عبائة الدين وهيطبق عليه الشريعة وعمال يخوفه ولسة أمبارح وأول عمال يقوله فين كاميليا وهنولع في كنايس أمبابة والكلام ده ... هيختار مين ؟ معلش هو معندوش وعي ومش مثقف زي حضرتك ومش هيعرف يدرك أن الأتنين أسخم من بعض ... فا هيضطر للأسف يختار أبو بدلة اللي هيموته من الجوع ... معلش أعذره أصله مش متعلم
- قالك جاتلكم ماسيدجات بتطالب بالتصويت لشفيق ... أيوة يا عم جت ماسيدجات ... وده كان غلط ... لكن عندنا أفتراضين .. الأول أنها حقيقية وموجهة من ناس مسيحيين بسبب خوفهم من التيار الديني أو الثاني أنها موجهة من جهات امنية عشان يدبسوا المسيحيين ويلبسوهم العمة قصاد الكتل الثورية ... في الحالتين غلط ... لكن طب ماهو حصل برضه خطاب ديني وتوجيه للغلابة أن نعم طريقك للجنة ولا طريقك للنار ... واللي ميرشحش الأخوان يبقي كافر ... التوجيه في الأنتخابات علي أساس ديني بيحصل عند المسيحيين والمسلمين ... أرجوكم متذودوش الموضوع وتحملوه كله للمسيحيين ... كلنا واقعين في نفس الدايرة ونفس الأستقطاب ولازم ندور أزاي نخلص منها بدل ما نقعد نهاتي في الكنيسة وجهت وأنتوا غلطانين والجامع وجه وأنتوا غلطانين !!!
- لو فعلا المسيحيين بالقوة الأنتخابية دي في شبرا وفي أسيوط وفي مصر الجديدة كان زمان نواب شبرا وأسيوط مسيحيين
- شفيق واخد 2 مليون صوت من الدقهلية والمنوفية والغربية والشرقية ... ودول كلهم أخوان ده لو تعرف يعني
- معظم اللي انتخب شفيق أنتخبه عشان فاكرينه هيرجع الأمن ... وسواء مسيحيين أو مسلمين بقي الأتنين غلطانين ... كان في توجيه
لأنتخاب شفيق ؟ أه كان في .. كان في توجيه للكل بما فيهم المسيحيين ... لكن مش من العدل ومش من المنطقي أنك تسيب كل الأسباب اللي فاتت دي وتمسك في خناق المسيحيين اللي أنتخبوا شفيق
- علي فكرة المسيحيين مش غنم وكلهم بيمشوا مع بعض وليهم رأي واحد ... هما عندهم عقل علي فكرة وبيفكروا ... ناس كير منهم شافت أن أمنها أهم من أي حاجة فا أنتخبوا شفيق ... ناس تانية شافت الثورة فا انتخبت حمدين أو خالد علي أو قاطعت ... فا مينفعش تعمم وتقول أصل المسيحيين عملوا كذا
- شفيق لعبها صح ... أستفاد من صورة أبو الفتوح اللي ذادت سوء بعد المناظرة مع عمرو موسي وأستغل خوف المسيحيين من الأخوان وراح ضحك عليهم وزار كام كنيسة وكام دير وضحك عليهم ... ومعلش يا سيدي المسيحيين جهلة وأميين ... ما هما من الشعب اللي متعلمش كويس ومبارك كان رابطه دايما بلقمة عيشه وأمنه فا اتضحك عليهم وأختاروا الأمن الزائف اللي شفيق زينهولهم ... بتلومهم هما ليه ومش عايز تلوم شفيق نفسه اومرشحك عشان معرفش يلعبها معاهم كدة ؟ علي الأقل يا سيدي مرشحك كان هيبقي صادق مش بيضحك عليهم زي شفيق !!!
- كل اللي انتخب شفيق أنتخبه عشان مصلحته الشخصية . ومعظمهم اللي كانوا رافضين الثورة من البداية مسيحيين ومسلمين . بلاش تلوم مجموعة معينة وتحملها المسئولية أو تركز في ده عشان معلش في ناس بتصدق والموضوع بيقلب معاها بطائفية وممكن الموضوع يخرج عن المشادات الكلامية وحد يتهور ...
- ليه بتلوم المسيحيين أنهم متحدوش خلف مرشح ثوري ؟ إذا كان المرشحين الثوريين نفسهم متحدوش مع بعض !!! كله قالك ألعب رئيس ومتحدش مع التاني ... طب أيه بقي ؟ أشمعنا المسيحيين هما اللي بقيوا كخة دلوقتي ؟
- أصلا عمالين تقولوا لو فلان أدي أصوات لفلان ولو مين تكتل مع مين وأصوات مين فتت أصوات مين .... أنتوا ناسيين أنها أصلا مسرحية ؟؟؟؟
للتوضيح برضه عشان أنا عارف أن في ناس دايما بتفهم غلط وبتبقي محتاجة الخلاصة
1- أنا ضد شفيق .. أنا ضد شفيق ... أنا ضد شفيق ... أنا ضد شفيق
2- أنا مش بقول المسيحيين مش غلطانين و ملايكة ومغلطوش
اللوم كل اللوم على الي نسي المسيحين اللى حموهم في التحرير اثناء الصلاه في التحرير ولما بدا لهم شبه تمكين نسوهم وكان كل خطاباتهم لطمأنه امريكا واسرائيل و السعودية وايران كل على هواه ولم يمكن هناك رسالة طمأنه واحدة لشركاء الوطن و اصحاب نفس الحلم ونفس الهموم
ردحذفاوجزت فانجزت...حسبنا الله و نعم الوكيل فيمن يريد بنا و بشعبنا سوءا...اللهم ولي من يصلح
ردحذفأشكرك جزيلاً لأنك عبرت عما بداخلى.....
ردحذفكلام في الجون لسة كنت باقوله الصبح في التليفون عن ما يسمى بحزب الكنبة،،، يا جماعة حزب الكنبة هما الأغلبية صدقوووني و تهميش الثورة ليهم و المزاح والنكت عليهم خلاهم يعندوا ويختاروا شفيق عشان يثبتوا انهم الأغلبية. على فكرة أنا مسيحية وانتخبت حمدين صباحي انا واسرتي كلها. فوقوا بقاااااا
ردحذفchapeauuuu :):)
ردحذفمتفق معك ان فيه مبالغة و كأن المسيحين هما اللى نجحوا شفيق بس منقدرش ننكر ان فيه مسيحين صوتوا له و كان من الافضل ان نصوت لحمدين
ردحذفtab ma fi muslmin bardo sawato l shafe2 w kan a7san yesawato l 7amdin, w ba3din, almuslmin bass howa ely sawato lel ekhwan el sara2o w ba3o el sawra
حذفصح اوي الكلام ده مع اني زعلت من كتير من المسيحيين واضيف ان ففيه ناس شايفين ان دي مصلحة البلد مش لمصالح شخصية
ردحذفLama aswat el mese7iin mo2asera keda ma asaretsh leih fi magles el sha3b
ردحذفok . tamam
ردحذفانا مصري مسيحي شكرا لانك منصف وحقاني
ردحذفعلي فكره انا مسيحي وانتخبت حمدين صباحي وليا اصحابي كتير اختارو الي هما عايزينه دي ملهاش دعوه بالدين دي حريه
ردحذفلا طبعا المسيحيين اولا نصهم بس اختار شفيق انا كل اصحابى اختارو حمدين وفى ناس اختارو موسى بس نسبتهم اقل
ردحذفثانيا ومين قال ان شفيق ليه علاقة بالشهدا هو معنى ان مبارك ووزير الداخلية غشاشين يبقى كل الوزراء ذيه الراجل عمل انجازات تحسبله فى وزارته يعنى انت لو عينوك وزير مش هتحاول نجتهد فى وزارتك ولا هتقول لا ده الرئيس حرامى انا مش هقبل المنصب انت لو مديرك فى الشغل مرتشى هتقدم استقالتك ولا هتمشى انت بأمانه ملكش دعوة بيه
والكلام اللى بيقول ضيعطوا الثورة لا طبعا الثورة حققت هدفها الاساسى وهو ان الحاكم دلوقتى عارف ان فى اى لحظة ممكن الشعب يطيح بيه وعمر ما الزمن اللى فات هيرجع تانى
المسيحيين اللى اختاروا شفيق اختاروه بمزجهم بمزجهم وانا منهم واصحابى كتيييييييييييييير مسلمين اختاروه وكانوا مشيين يعلقوا صورته فى الشارع
علفكرة انا مسيحى وانتخبت صباحى واصحاب كتير ليا مسيحيين انتخبوا صباحى .. منكرش انه فيه انتخب شفيق .. لكن عاوز اقول
ردحذفدى حرية وديمقراطية .. بجد حزين جدا من الكلام اللى بسمعه من اخواتى المسلمين .. وربنا ينور بصيرة الناس ويعرفوا ان بجد المسيحيين دول بجد وطنيين وبيحبوا البلد دى جدااااااااا زى اخواتهم المسلمين وربنا يسامح اى حد قال كلمة وحشة فى حقنا لان ربنا علمنا كده .. وشكرا لكاتب المقال الرائع
i am a coptic christian and voted for sabahy, ahh i go to church every week and no 1 told me to vote for any1
ردحذفاظن ان شماعة المسيحيين هي بسسب فشل الثوار وعدم توحدهم خلف مرشح واحد المثل يقول ( طمعنجي بنالة بيت فلسنجي سكتلة فية )كان من الأجدر التوحد .... !!
ردحذفالكلام اللي تقوله كان بيكون صح في حالة أن الإخوة المسيحيين حصروا بين شفيق و مرسي ... لكن كان هناك خيارات أخر مثل صباحي وعمرو موسى .... لماذا أعرض عنها الأخوة المسيحيون ؟؟!!
ردحذفوالكنيسه بينا وبين شفيق صفقه وياريت نبقى واضحين زى ما كنا بنقول فى صفقه بين الاخوان والعسكر ولا هو مهاجمة الكنيسه حرام ومهاجمة الاخوان والسلفيين حلال ؟
ردحذفيا استاذ العقلاء أمثالك ليسوا كثيرين و الغالبية العظمى من المسيحيين وقعوا فريسة للاعلام المخابراتى ضد الاخوان و صدقوا ما يذاع ضد التيار الاسلامى والغريب يا سيدى انهم لا يتعلمون و نسوا او تناسوا من فجر كنيسة القديسين بالاسكندرية ... و من قتل المتظاهرين فى ماسبيرو .. ومن افسد عيد الميلاد فى نجح حمادى ... فكيف ترتموا فى أحضان من قتل و دهس و حرق و فجر لتهربوا ممن لم تثبت فى حقه اى جرم فى حقكم
ردحذفلا تلوموا المسيحيين على فساد التعليم ، التعليم هو الأساس ، والتعليم هو الحل
ردحذف