نظرا لحالة الهيام العاطفي بالجيش والسيسي و أي ربع متر قماش
مموه لزم التوضيح
طيب ... بما أن الواحد أتمرجح شمال يمين واتشقلب في حكم
عسكري وحكم ديني ، ونظرا لحالة الهيام العاطفي بالجيش والسيسي و أي ربع متر قماش
مموه لزم التوضيح .
المشكلة مشكلة ثقافة ... "عندينا" أي حد يصرف
عليك أو يعزمك علي الغدا أو يقف معاك موقف جدعنة بتفتحله كل أبواب قلبك وتديله
الأمان و يبقي كأنه أبوك .
أيوة المشكلة مشكلة حنان ... مش واحدة أسمها حنان ... بس
الشعب ده محتاج حنان ... ياتي زوئنن :)
بجد مش تريقة ... واللي هيزعل هقوله السيسي بنفسه قال
كدة في البيان بتاع ال 48 ساعة ... هااا أعترض بقي علي كلام ... السيسي !
نظرا للثقافة الشرقية المقفلة المتزمتة – شكلا وليس
مضمونا واللي في القلب في القلب – فا عندنا بيقولوا عيب تعترض علي أبوك وعيب تبص
في عينه ولو ضربك 100 قلم حرام تشتكي ، ولو أشتكيت تبقي قليل الأدب والناس تكرهك
وتقول عليك ناقص رباية مما سيجلب عليك 100 أو 200 قلم تانيين لما الموضوع يوصل
لأبوك ويعرف أن الناس بتقول عليك مش متربي وأن هو معرفش يربي !!! طب تيجي أزاي !!!
عيييييييييب ... عييييييييييب !!
ولأنك أتعودت تعامل أي حد كبير يقف معاك موقف جدعنة علي
أنه أبوك والناس كلها حاسة أن الجيش وقف جنب الناس موقف جدعنة فا أبتدوا يعاملوه –
ومن زمان شوية علي فكرة – علي أنه أبوهم ... بس الجيش مش أبوك !!
أيوة الجيش مش أبوك !! الجيش شغال عندك والداخلية شغالة
عندك ... أيوة صدقني !!
يعني ينفع تقول للجيش والشرطة أنت ليه سبت السلاح يدخل البلد ويتهرب للداخل وراجعين نشتكي دلوقتي أن الجهاديين معاهم سلاح !!
أنت ليه خايف تسأل السؤال ؟؟ ليه محسسني أني لمجرد سألت
السؤال ده أبقي خاين !!
يا عم ماهي مش وظيفتي أنا أني أقف عالحدود ، هو اللي
وظيفته كدة !!
ومش عيب أنك تسأله .... أصله مش أبوك !!
مش عيب أنك تسأل ظابط الداخلية ليه كنت سايب العربيات
تتسرق في الشوارع والتحرش يزيد ؟!! شخصية الرئيس و شخصية رئيس الوزراء وأتجاههم
الديني ميمنعوش أنك تقفش الحرامي أو المتحرش !!
أيوة صدقني من حقك تسأله وتحاسبه لأنه مش أبوك !!
أنت من حقك أنك تسأل الجيش ليه سبتوا البوابة ملحومة في
الأستاد حتي لو الأخوان هما اللي عملوا العملة السودة دي زي ما بيتردد حاليا !!
من حقك تسأل الداخلية ليه – لو فعلا القناصة بتوع 25
يناير من حماس – ممنعتوش القناصة أنهم يطلعوا فوق سطح وزارة الداخلية وفوق العمارات
والكباري ويضربوا الناس من فوقيها ولبسوهالكم ؟؟!!
أيوة صدقني من حقك تسأل ... أصل الجيش والداخلية مش أبوك
!! ولو عملت كدة متبقاش خاين !!
شايفك يا بتاع التوقيت ياللي عمال تقولي مش وقته مش وقته
!!
عارفين أن اللبش اللي حاصل في البلد حاليا و الهجوم
الأرهابي علي الأقسام والكماين ومطار العريش من أرهابيين مسلحين يعتبر أعتداء علي
مصر ولازم نقف مع الجيش .. طبعا مأنكرتش ده وأنا بدعم الجيش في حربه ضد الأرهابيين
دول و إنشالا حتي ننزل نقف لجان شعبية تاني ونسيب الجيش والشرطة يوقفوا العالم دول عند
حدهم ... أصل دي مش محتاجة سؤال علي فكرة !!
الفكرة أن الناس خلطت بين دور الأب – السلطة المطلقة –
اللي طالما هو اللي بيدخل قرش وهو الوحيد اللي ماسك عصاية وهو الموكل له أنه
يتخانق مع الجيران وهو اللي بيجيب لبس العيد وهو اللي بيضرب الأم - دي دعابة- يبقي حرام نبص في
عينه أو نسأله في أي حاجة !!
لأ معلش إذا كان الجيش أبوك فا هو مش أبويا
بص يا عم الحج منك ليه ...
ندعم الجيش ويحمينا ؟ أه طبعا ... هو عيب ولا حد يكره ؟؟
مصر تبقي بتتحارب نصبر – مش ننسي – ونقف معاه ونشيل
السلاح حتي لو طلبت ... أه ... هو عيب ولا حد يكره أن الجيش يقوم بواجبه ويدافع عن
البلد ؟؟
لكن مش هننسي ....
ومش غلط أننا نطالب بحساب المقصرين ...
ومش غلط أننا نسأل ...
ومش مشكلتنا انك مش قادر تفهم ده او تقدره ...
انا مبسوطه بخلع مرسى والاخوان... وبتفرج على الجيش واللى بيعمله الفتره دى... لكن مش مسلَِمه ليهم قوى كده لان دورهم كان لازم يبقى من زمان.
ردحذفبمعنى تانى فرحتى بسقوط الاخوان مش هاتخلينى اصقف واطبطب على اى حد ساعدنا فى اسقاطهم غير لما يثبت دوره!
فرحتنا بسقوط نظام لا تلهينا عن محاسبه المخطئ .... انا دلوقتى بتفرج على الجيش والكوره فى ملعبه هايسجل كام هدف !!!!
ردحذف