الثلاثاء، 22 مايو، 2012

حوار بين ناخب ومقاطع



دار هذا الحوار في مكان ما علي سطح كوكب الأرض 


أي تشابهه في الأسماء أو الأماكن أو الظروف هو طبعا ... لوك لوك لوك ... عارفين البقين اللي بيتقالوا في المواقف دي .... 


ناخب : هتعمل أيه بكرة ؟
مقاطع : هنام
ناخب : أنا بتكلم جد
مقاطع : وأنا بتكلم جد الجد
مقاطع : ليه ؟ يعني مش هتنتخب حد ؟
مقاطع : ايوة أنا مقاطع
ناخب : خربتوا البلد
مقاطع : تاني ؟ قدمت قوي الكلمة دي علي فكرة
ناخب : هو انت ليه مش هتشارك في الأنتخابات ؟ مفيش ولا واحد عاجبك ؟
مقاطع : مش فكرة مفيش ولا واحد عاجبني ، بس المشكلة في الأنتخابات نفسها هي اللي فيها الغلط كله
ناخب : أزاي ؟
مقاطع : دلوقتي مين اللي هيشرف علي الأنتخابات دي ؟
ناخب : القضاء  
مقاطع : القضاء ده ساب أجانب يهربوا برة وهما متهمين في قضايا تمويل أجنبي ، والقضاء ده كان بيشرف علي انتخابات 2005 المزورة و2010 المزورة ، وأستفتاء مارس وأنتخابات مجلس الشعب اللي فاتت ... القضاء ده مش عارف يعمل حاجة وقابل أن يبقي في لحد دلوقتي مشاكل بتتحل بالجلسات العرفية اللي بتتعمل عيني عينك و اللي تعتبر أكبر أهانة ليه ، القضاء ده اللي متساهل جدا في قضايا مبارك واعوانه ونازل سلخ في الناس الغلابة العادية وعمال يدي براءة للي قتلوا الشهداء من سنة ونص ... فكرك يعني هيعمل حاجة مختلفة المرادي ؟
ناخب : بس هما قالوا أن هيبقي في مندوب من كل مرشح في كل لجنة
مقاطع : يا راجل ... يعني هو المندوب ده هو اللي هيمنع الغلط أنه يحصل ؟
ناخب : حتي لو كدة هيبلغ المرشح بتاعه
مقاطع : وبعدين ؟ حتي لو في عك المرشح ملوش حق يطعن علي نتيجة الأنتخابات بحسب المادة 28 من الأعلان الدستوري ... يعني النتيجة اللي هتطلع هيقبلها الكل ورجله فوق رقبته
ناخب : لا يا راجل مش للدرجادي
مقاطع : طب أنا هقولك علي حاجة تاني ... الرئيس اللي انت رايح تنتخبه ده هيعمل أيه بعد كدة ؟
ناخب : يعني أيه ؟ هيبقي رئيس الدولة طبعا
مقاطع : أيوة .. يعني أيه صلاحياته ؟ يقدر يعمل أيه وميعملش أيه ؟ ياخد قرار حرب ولا لأ ... يحل مجلس شعب ولا لأ ... يحل حكومة ويعين غيرها ولا لأ ... كدة يعني ... هيمعل أيه من دول ؟
ناخب : هيعمل كل ده طبعا
مقاطع : مين قالك ؟
ناخب : يعني أيه مين قالك ؟ مش هو المفروض يعمل كدة ؟
مقاطع : الدستور لسة متحطش يا معلم ... يعني لسة متحددش صلاحيات رئيس الدولة لسة ... يعني بتختار واحد وبعدين تجيبله وظيفة
ناخب : ايوة بس لما أختار واحد كويس وأبن حلال وبتاع ربنا هيقدر ياخد صلاحياته بنفسه
مقاطع : أزاي يعني ؟ مش هو اللي هيحدد صلاحياته ... الصلاحيات هتتحددله ...
ناخب : بس هيعدل البلد
مقاطع : وازاي يعدل البلد لو مثلا نظام برلماني ؟ يعني ميقدرش ياخد قرار غير لما يوافق عليه مجلس الشعب ... تخيل رئيس كويس لكن مجلس شعب زي اللي عندنا ؟ هيعمل أيه ؟ يقولهم عماير وسكن مثلا يقولوله مواقع جنسية ولعب اطفال مسيئة للأديان !!
ناخب : لأ برضه الموضوع مش هيبقي كدة يعني ....
مقاطع : امال هيبقي ازاي ؟ صدقني مش هيبقي غير عك في عك ... طب هقولك حاجة تاني ... مش انت عايز رئيس يمشي القانون عالكل ؟
ناخب : طبعا
مقاطع : تفتكر المجلس اللي سحل ودهس عري وحاكم عسكريا وبيحمي مبارك هيجيب حد يحاسبه علي هيعمله ؟
ناخب : صعب
مقاطع : طيب .. يعني هو هيجيب حد يداري عليه زيه زي مبارك ما جاب حد يداري عليه ... وهنفضل ماشيين في الظلم ده و نفس العك ونفس الدايرة
ناخب : يعني انت مشكلتك مع الأنتخابات ؟ طب مفيش ولا مرشح عاجبك ؟
مقاطع : بص ... قصة المرشحين دي حاجة تاني ... دي لو انتخابات ثورة صحيح يبقي مش هتلاقي فيها حد زي شفيق اللي كان رئيس وزراء عينه مبارك وقت الثورة عشان يردم عليها وحصل في عهده موقعة الجمل وجاي يترشح تاني لمنصب اكبر وعايز يقنعنا أنه مش من النظام .. ومش هتلاقي واحد زي عمرو موسي كان وزير لمبارك وسكرتير لكل حكام العرب وعايز برضه يحكمنا ويقولك أنا مش من النظام
ناخب : يعني كلهم برضه مش عاجبينك
مقاطع : لو كانت الأنتخابات في ظروف مختلفة كنت انتخبت خالد علي
ناخب : طب وليه متروحش تديه صوتك ؟
ناخب : خالد علي ملوش فرصة أنه يكسب المرادي لأن زي ما قلتلك موضوع الأصوات بتاعة الناخبين مش هي اللي هتفرق في الأنتخابات ... لكن اللي ممكن خالد علي يكسبه من أنتخابات زي دي ان يتعرف أسمه ويتطرح للشارع زي ما أيمن نور نزل أنتخابات 2005 ومحدش كان يعرفه قبلها لكن من خلال الأنتخابات أسمه أتطرح والناس عرفته
ناخب : اااااااااه .. يعني يعمل ترويج لنفسه عشان بعد كدة ممكن يكسب
مقاطع : بالظبط ... وخالد علي ظهر في برامج ومناظرات وخد فرصة انه يظهر وده من وجهة نظري المكسب الوحيد اللي قدر يحصل عليه واللي كان ممكن يحققه من الأنتخابات دي
ناخب : طب ما تروح بكرة تنتخب وخلاص ومتبقاش سلبي
مقاطع : يعني أنا بعد ما بقالي سنة ونص في التحرير وعملت ثورة أيام ما كنت انت قاعد عالكنبة وماسك في بابا مبارك بتقول علي انا سلبي ؟ ده انت أول مرة تقوم من عالكنبة .. ولا أفكرك ؟
مقاطع : خلاص يا عم أنت هتزلني ؟
مقاطع : لأ مش بزلك لكن عايز أقولك أن أوقات المقاطعة مبتبقاش سلبية .. لكن بيبقي قرار أيجابي بعدم الأشتراك في حدث محسوم من قبل ما يبدأ ومفيش فايدة من المشاركة فيه أصلا
ناخب : شوف ... أنا حاسس أني لازم أشارك وهروح برضه بكرة انتخب
مقاطع : براحتك ... بس عايز رأيي ؟
ناخب : أيه ؟
مقاطع : خربتوا البلد 

ليست هناك تعليقات:

إرسال تعليق