الجمعة، 28 يونيو 2013

أحنا عملنا حادثة مع العبث يا بيبي ....



لو الأخوان حرقوا مقرات حزب الدستور أو التيار الشعبي أو حتي الوفد يبقوا بلطجية ولازم يتحاكموا ، أما بالنسبة لحرق مقرات الأخوان فا هو عمل وطني ، وفي نفس الوقت الأخوان شايفين حرق مقرات الأحزاب المدنية واجب وطني وديني !!!

الشرطة لما ترفض تأمن مقرات الحرية والعدالة تبقي بتأدي عمل وطني والناس تسقف ليها ، بينما التعذيب في الأقسام والأنتهاكات اللي بيمارسوها – أخطاء فردية – ملوش لازمة نتكلم عليها دلوقتي ، وفي نفس الوقت كنتوا هتقولوا أيه علي الشرطة لو رفضت تحمي مقرات أي حزب تاني ؟؟

قتل الشيعة وسحلهم في الشوارع أجرام وأرهاب ، وفي نفس الوقت بشوف أصوات كتير بتنادي بفعل المثل بالأخوان وقياداتهم حال القبض عليهم ، والداعيين لكدة شايفين أن ده عمل وطني جزاء لأخوان علي تخريبهم مصر وخيانتهم للوطن !! يا سلااااااااام !!!

أنك تبقي عارف أن المعارضين للأخوان معاهم سلاح وتتعامي عن ده وتشوف لده مبررات – طالما هما من نفس معسكرك – وفي نفس الوقت تستنكر أن الأخوان يشيلوا سلاح ويحموا نفسهم ومقراتهم !!!

زعلانين قوي من طفلة في رابعة العدوية بتهتف "يا لميس يا حديدي نفسي أخنقك بأيدي" وشايفين أن ده ضد الطفولة والأمومة وسيد الحبايب يا حنانا ننة !!! وقالك بيعلموا الأطفال الكراهية !!! أنتوا مشفتوش أطفال في التحرير بيهتفوا ضد مبارك والعادلي والناس شايلينهم علي الأعناق وفرحانين بيهم وبيصوروهم و عاملينهم أبطال وشايفينهم "ذوي وعي ثوري ووطنيين " !! ياخي أسمالله !!

أزاي شايفين أن الشرطة مع الثورة والثوار وهي واقفة تتفرج علي الناس اللي بتتقتل من الأخوان في أسكندرية والمنصورة ؟؟؟

مين مؤسسين حركة تمرد ؟ مين المسئول اللي بيعد الأستمارات ؟ أيه هو الرقم الحقيقي اللي وصلت ليه أستمارات تمرد ؟ فين المركز الرئيسي ل تمرد ؟ أشمعنا تمرد هي اللي سمعت قوي كدة رغم أن تم جمع أستمارات و توقيعات ضد العسكر و ضد غيرهم وفشلوا ؟ أشمعنا المسئولين عن حملة تمرد مبيتعرضوش لهجمات أو بلطجة أو تهديد بالقتل أو تتلفق ضدهم قضايا زي كتير من الثوريين سواء من الأخوان أو أمن الدولة ؟

توفيق عكاشة بقي ثورجي ؟؟؟ وقناة الفراعين بقت مصدر معلومات موثوق ؟؟؟

عادي عادي .... محدش عايز يشوف ... مش وقته الكلام ده ...

جايبين دكتورة تحلل شكل قعدة السيسي أثناء خطاب مرسي الأخير عشان تعرفوا هو الجيش ناوي علي أيه ؟؟؟ هي حصلت ؟؟؟ .... وماله !

كمان سنة لو نزل مليون عملوا حملة "تشرد" و طالبوا بإقالة فلان الفلاني هتقولوا عليهم أيه ؟

أحنا عملنا حادثة مع العبث يا بيبي :/

https://www.youtube.com/watch?v=yMjem_VhIeI

هناك تعليق واحد: