الجمعة، 4 مارس، 2011

الوحشين اللي جم بعد 25 يناير

ولا إنتوا فجأة إكتشفتوا إن مصر فيها عشوائيات وناس فقيرة ومش مثقفة


يوم 25 يناير كان بداية الثورة وفيها بدأ المثقفين بالمطالبة بالتغيير ، وكانوا نضاف وضاربين جيل في شعرهم ولابسين ماركات وعندهم لاب توبات وبيقعدوا في سيلنترو وبينوس وبيروحوا لاكازيتا ، ولما طلعوا مظاهرات مكسروش ومضربوش ومشتموش ومتخانقوش .... لكن العيال البيئة اللي جم بعد 25 يناير دول لابسين شباشب ووحشين وريحتهم عرق وصوتهم عالي وكسروا وخربوا وطالبوا برحيل مبارك وشتموا  ... دول قلالات أدب ... الثورة إتسرقت بعد 25 يناير ... دول حتي كان في بينهم إخوان ... المطالب الفئوية اللي كل شوية يعملوا مظاهرة ويوقفوا حال البلد ... العيال دول خلوا مفيش أمن في الشارع والبنات بتتخطف والعربيات بتتسرق والولاد مش عارفين يروحوا مدارسهم ... الثورة باظت

( كلام بسمعه كتير قوي قوي قوي من ناس كتير ومستغرب هو أنا مجنون ولا مش فاهم والناس دي هي اللي فاهمة ؟؟؟ لكن أنا هعرض وجهة نظري في العيال اللي نزلوا بعد 25 يناير )

أي مجتمع بيكون فيه مثقفين وغير مثقفين ... سلبيين وإيجابيين ... مجرمين ومحترمين

ودايما الإيجابيين والمثقفين والمحترمين نسبتهم بتكون أقل في المجتمع ... والنسبة دي بتفكر وبتحلل الأحداث لكنها كتير مش بتعرف تاخد أكشن عشان النظام الفاسد اللي بيحكم أي مجتمع بيهتم جدا بالغالبية الغير مثقفة الغير متعلمة ويبزل كل مجهوده في تغييبهم وإفقادهم وعيهم وتمييزهم وتوصيلهم لحالة الخنوع وفقدان الأمل عشان ميحاسبوهوش علي فساده ... ويعمل بقدر طاقته علي تقليل عدد المثقفين والحجر علي أرائهم وتفشيلهم وتطفيشهم وتخويفهم عشان ميبقوش لقمة في زوره

السلبيين والمجرمين والغير مثقفين إستحالة يبدأوا ثورة أبدا أبدا أبدا ، وعمرها ما حصلت في التاريخ إلا إذا كانوا كلهم جعانين

واللي حصل يوم 25 إن المثقفين خرجوا وبدأوا الثورة مضحيين بكل شئ وكانوا شايلين روحهم علي كفهم ، وكانوا بيهتفوا بالحرية والمساواة والعدالة وغيرها من المطالب المشروعة اللي مكانتش موجودة في البلد ... الحرية أهم عند المثقف من الأكل والشرب ... وكان النداء التالي لده هو (يا أهالينا إنضموا لينا )

طبعا أهالينا هنا المقصود بيها باقي المجتمع ... الغلابة المطحونين المغيبين ... وعلي فكرة الثورة كملت يوم 26 و27 بالمثقفين وإنضم ليهم بعض الشعب ... طبعا الناس مكانتش فاهمة لكن عبال ما فاقوا يوم 28 نزل باقي الشعب )

طبعا العدد بيدي شرعية للمطالب ... واللي نزلوا وإنضموا للثورة يوم 28 كانوا الغلابة المطحونين اللي مكانوش يعرفوا يبدأوا ثورة أبدا لوحدهم ... إنضموا لحد وراهم الطريق .. فتحلهم السكة ... قالهم إزاي يطالبوا بحقوقهم ... وزي ما إتفقنا إن العدد الكبير اللي بقي في الثورة إدي شرعية أكبر للمطالب ... فبقت مصر كلها في الشارع ... وزي ما إتفقنا إن المجتمع (أي مجتمع) فيه خليط من كل أنواع البشر

ووسط الناس اللي نزلت كان في مصريين طيبين ما صدقوا الثورة قامت فأنضموا ليها

وفي مصريين مغلولين داقوا المر علي إيدين المباحث والداخلية يمكن إتعذبوا وإتهانوا وإتظلموا وإتقتل قرايبهم في الأقسام ودول أعتقد مهما حاولت تقوله سلمية سلمية وتفهمه مش هتقدر تسيطر علي عدد كبير منهم ... حط نفسك مكانه ... فكان لازم يعمل كدة (يكسر قسم يحرق عربية شرطة) غلط بس أنا معرفش لو مكانه كنت هعمل إيه ... وبصراحة بقي الداخلية تستاهل

في نوع تاني مصريين لكن حرامية ... وأي فوضي وغياب أمني في ناس بتعرف تستغله كويس ... وبرضه لو الأمن والداخلية شرفاء كانوا هيعرفوا يتصرفوا إزاي مع دول ... لكن ماشي بلاش نرمي مسئوليتهم عالأمن ونكتفي بأن دول برضه شريحة من المجتمع متقدرش تنتزعها من الشعب لغاية ما تعمل ثورة سلمية وترجع تاخد بالك منهم تاني

وفي مصريين تانيين ياما عانوا وياما إتزلوا وياما مسحوا تراب المصالح الحكومية بكل الطرق السلمية زمان عشان مرتباتهم تبقي من 180 جنيه ل 400 جنيه ,,, وطبعا قوبلوا بالبيروقراطية النظامية ولا حياة لمن تنادي ... وما صدقوا لقيوا مطالب بتتحقق فراحوا رفعوا صوتهم وقالوا عايزين حقنا ... تقدر تقولهم لأ ؟ ... أنا مقدرش أجي لواحد مكبوس علي نفسه ومطحون في شغله وعامل ميت جمعية عشان يااااادوبك يعيش شهر بشهر وأقوله ... لحظة واحدة حضرتك ... اللي بتعمله ده غلط ... إنت معندكش ثقافة التظاهرات ..... هو كان لاقي ثقافة الشبع عشان يعرف ثقافة التظاهرات ؟!!!!! ما تقولوا كلام يخش العقل ... ماشي اللي بيعملوه ده كان غلط (إستراتيجيا) لكن يا سيدي واحدة واحدة عالناس ... سبهم يصرخوا شوية ده حتي الكلام كان ممنوع في عهد النظام السابق

وفي مصريين برضه تانيين كانوا مغلولين من كتر ما شافوا فرص كانت من حقهم بياخدها ناس تانية أقل منهم بكتير لمجرد إن عندهم واسطة كبيرة ... ومصدقوا لقيوا الفاسدين بيقعوا فإبتدوا يفتحوا كل الملفات القديمة عن الظلم والمحاباة ... أه مكانش وقتها لكن دي ناس إتظلمت ونامت بتحلم بيوم الحساب ورجوع الحق

تعال بقي بص علي التركيبة المصرية اللي فاتت وقوللي ... مين في دول مش مصريين ؟ يجري إيه لو الناس دي مكانتش نزلت مع المثقفين بعد 25 يناير ؟ تفتكر كانت هتبقي ثورة ؟ تفتكر كان لازم يقعدوا في بيوتهم عشان شكل الثوار نضيف و ب جيل و بارفان ؟

وبعدين يا جماعة مش هو ده شعبنا وأهلنا ؟ ولا إنتوا فجأة إكتشفتوا إن مصر فيها عشوائيات وناس فقيرة ومش مثقفة ؟

أسف جدا .. الناس دي مصريين إدوا صفة الشرعية للثورة وكانوا أداة ضغط علي الحكومة وهما اللي عملوا الثورة ... أفضل مليون مرة إنهم ينزلوا ويطالبوا بحقوقهم ولا إنهم يقعدوا في بيوتهم سلبيين زي ناس كتير
ثم مش كان أحسن ينزلوا الثورة ويطالبوا بالحرية أحسن ما كان النظام يضحك عليهم ويقعدهم في بيوتهم ويسكتهم ب فلوس وبطانية ويقتل الثورة في مهدها ؟

الناس دي داقت الجوع زمان ومش فارق معاها تجوع كام يوم عشان بكرة ولادهم ميعيشوش جعانين
الناس دي عاشت في إرهاب النظام اللي فات كتير ومهمهاش تعيش فترة(طولت أو قصرت) في إنفلات أمني عشان بكرة يبقي في أمن بجد وميبقاش ظابط الشرطة بسرق ويفرض أتاوة ويغتصب ولادهم بكرة وبعده
الناس دي كانت مسروقة ومنهوبة ومظلومة وخرجت قالت اااااااااااااااااااه ... أظن عيب قوي قوي قوي بعد كل ده نقول عليهم بوظوا شكل الثورة

هتقولي يعني عاجبك اللي بيحصل في البلد ده دلوقتي ؟
هقولك : لأ طبعا لكن بالله عليك يا أخي ماذا تعرف عن كلمات زي التكلفة ، الثمن ؟ مفيش ثورة وحرية ببلاش ... مفيش ثورة في بلد قامت والأحوال الإقتصادية متدمرتش لفترة وقامت تاني أحسن من الأول ... أنا مبفهمش كتير في الإقتصاد لكن أظن واحد زي نجيب ساويرس بيفهم ... صح ؟ الراجل ده بقي قال بنفسه إن الفترة اللي جاية هتكون واعدة جدا للإقتصاد لأن المناخ الديموقراطي الحقيقي والعدالة هما أفضل شئ لنمو الإقتصاد وإجتذاب المستثمر
عارف إن إحنا متأخرين جدا ديموقراطيا ومستوانا فيه دلوقتي واحد من عشرة أو يمكن نص من عشرة لكن فكركم نقف ونقول لأ إحنا مستوانا وحش ومنعرفش نكون ديموقراطيين فبلاش نتعلم ونكمل المشوار ؟!!!!

أما بقي بالنسبة لفكرة الثورة إتسرقت وفي قوي سياسية بتحاول تخطف نتايج الثورة (وده حقيقي) فكل اللي أقدر أقوله هو إن في ناس كتير بتحارب ده بتمسكها بإن يكون في مساواة وعدالة في الإنتخابات ، ولو خايفين من الإخوان أو غيرهم ليه متتلحلحوش وتقوموا تشوفولكم حزب سياسي معتدل تشاركوا فيه بإيجابية وتبقوا أحسن من الإخوان فالناس تنتخبكم وبكدة تبقوا ساهمتم في الثورة (معلش غصب عنكم إحنا أسفين) وعملتوا حاجة إيجابية للبلد

لو خايف عالأمن قوم أقف عسكري مرور
لما تشوف واحدة بتتعاكس إتكلم مع اللي بيعاكسها وفهمه ومتبقاش سلبي ... ويا ريت إنت كمان متعاكسش
لو خايف عالإقتصاد في المرحلة دي وعايز تسند البلد لحد ما تقف علي رجليها إعمل بس سيرش علي جوجل في طرق تنمية الإقتصاد في مصر حاليا
لو خايف علي مستقبل البلد سياسيا في الفترة اللي جاية وخايف من الإخوان يمسكوا البلد قوم إتلحلح أرجوك وشارك في أي حزب معتدل مدني

تحيا مصر . تحيا الثورة . عاش الشعب

ليست هناك تعليقات:

إرسال تعليق