أيها الإئتلاف ... من أنتم ؟

عندي شوية أسئلة وحاجات مش عاجباني في موضوع الإئتلاف ده اتمني إنكم تسمعوها وتحطوها في الإعتبار ... مش زي ما كتبت مرة عالوول بتاعتكم ونفضتولي

 

بداية طبعا (زي ما اتعودت من ساعة الثورة) أنا بتكلم بالنيابة عن نفسي بس ومش بمثل أي حد غيري .

عندي شوية أسئلة وحاجات مش عاجباني في موضوع الإئتلاف ده اتمني إنكم تسمعوها وتحطوها في الإعتبار ... مش زي ما كتبت مرة عالوول بتاعتكم ونفضتولي ... المهم 

-        من أنتم ؟ فعلا من أنتم ؟ أنا معرفش منكم حد غير شادي الغزالي حرب ... وشادي عرفته من التليفيزيون في أثناء فترة الثورة .... أما باقيكم فمعرفش ولا واحد منكم ، ولا عددكم ، ولا إيه هو التنظيم أساسا ، مع إن في نظر الناس إنتوا اللي بتمثلو شباب الثورة ... يعني بتمثلوني وبتتكلمو بأسمي وأنا معرفكمش .

-        هو إنتو لما جيتو تعملو الإئتلاف عملتوه إزاي ؟ بإنتخابات ؟ طب أنا مسمعتش عنها ؟!!  كان ممكن أرشح نفسي ... كان ممكن أرشح حد غيري ... لكن علي حسب علمي الإئتلاف ده فجأة لقيته طلع وبيتكلم بالنيابة عن شباب الثورة!!!

-        هو إنتو ليكم علاقة بالإئتلافات اللي عمالة تطلع ؟ ولا ده من تأليف ناس تانية ؟ يعني هو في بينكم تواصل ؟ ولا كله بيتحرك بدماغه ؟

-        معلش بس سؤال رخم ... هو إنتوا شايفين إن الثورة محتاجة لـ إئتلاف ؟ أنا شايف إنها مش محتاجة لـ أئتلاف ... لأن ميزة الثورة دي إن ملهاش قائد ... لما بيكون للحاجة قائد سهل يتلعب عليه وسهل يتضحك عليه ... والصراحة أنا قفشت من ساعة ما بعتو مندوبين من التحرير لعمر سليمان عشان يتكلموا معاه ورجعولنا يقولو خلاص يا جماعة لازم نمشي .

-        إنتو هدفكم كويس وعايزين تعملو حاجات مفيدة لكن بوجود الإئتلاف في حاجة تانية بتحصل .... الناس بتريح ... في ناس لما بتلاقي حد بيطالبلها بحقها بتنام في الخط ومبتعملش حاجة ... شوفو بقي كام ألف هينامو في البيوت لأن يا عم الإتلاف بيطالب وبيتحاور بإسمنا .

-        أنا الصراحة لحد دلوقتي مشفتش ليكم دور ... ممكن ده يكون تقصير مني إني مش بتابع نشاطاتكم ، لكن لا شفت حملات توعية سياسية ولا حقوقية ولا أي حاجة .... بصراحة الإئتلاف بالنسبالي مظهرش غير في 3 مواقف :

1-   خبر بيقول الإتلاف يدعم مصطفي الفقي لمنصب الأمين العام ثم خبر بيقول الإئتلاف ينفي تعيينه لمصطفي الفقي .

2-   خبر بيقول الإتلاف ينسحب من المشاركة في مليونية الجمعة القادمة ثم خبر يقول الإئتلاف ينفي إنسحابه من المشاركة في مليونية الجمعة القادمة .

3-   خبر بيقول تم حل الإئتلاف –وساعتها أنا فرحت الصراحة- ثم خبر بيقول الإئتلاف ينفي نبأ حله ، وبعديها شوية كلام علي 6 أبريل ومين هما ، ومين اللي إنسحب منهم ، والسايت اللي في ناس مسيطرة عليه وووو ... وكلام كتير ومفيش موقف واضح بخصوص الموضوع ده لحد دلوقتي .

-        لذلك يا سادة حال الإئتلاف بقي عامل زي حال الحكومة اللي فاتت واللي سبقوها ... مواقف غير مفهومة ، تصريحات متضاربة ، كيان بني علي أساس غير إنتخابي .

-        وكمان خد عندك دي بقي ... كلمة الثورة أو 25 يناير أو التحرير أو الشهداء بقت تريد مارك trade mark  أي حد يستخدمها يبقي جامد وليه مصداقية ... وشفنا طبعا كلنا محلات الكشري والملابس والأكشاك اللي فتحت جديد وسمت نفسها بالأسماء اللي قلت عليها دي عشان تبقي جامدة وحلوة وتكسب .... فا أي تلاتة أربعة دلوقتي بيلمو نفسهم ويقولك إحنا الإئتلاف ، ويبدأوا بقي يصدرو تصريحات ويعملو صفحة عالفيس بوك ويأيدوا هنا ويدعموا هنا ويشجبوا هناك ... وده اللي تلاقيه حصل في موقف مصطفي الفقي ... جاب كام واحد غير معروف إنتمائاتهم وإتجاهاتهم قالو إحنا إئتلاف شباب الثورة وبندعم الفقي وإتصورو معاه وبقت حكاية .

لهذا يا سادة ... لأن الأسئلة والنقط اللي قلتها دي مش واضحة إجاباتها بالنسبالي وبسبب حاجات تانية كتير أنا أطالب بحل هذا الإئتلاف فورا وبدون أي تأجيل ، خلو الناس كل واحد يدافع عن حقه ... كفاية تخلو الناس تلعب بأسمكم وبأسم الثورة ... إفهمو طبيعة جزء كبير مننا ألا وهي الكسل لما يلاقي حد بيتكلم بأسمه مبيعملش حاجة هو ، و لما بيلاقي في ناس بتتحرك بتوعية وحملات دعم وكدة بيريح ويركن في الخط  ... وإحنا محتاجين كل اللي كانو في التحرير وغيرهم وغيرهم أكتر يضاعفو النشاط ... عايزين الملايين ترجع تاني من نفسها للشارع لو حصلت حاجة مش مظبوطة ... مش ساعتها بقي نستني نشوف رأي الإئتلاف وموقفه ودعمه أو تأييده ... عايزين نخلص بقي من الدوشة دي .... وأكررها تاني .... لما بيكون في حد باين بيبقي سهل إستهدافه وسهل اللعب بيه .... أرجوكم ... الثورة مش محتاجة حد يدافع عنها.

شكرا ...

لاري نبيل