الجمعة، 10 يونيو 2011

ليه الداخلية مش أهم وزارة لازم نواجهها ؟


 
-        محدش يقدر ينكر إن الداخلية كانت ولازالت عاملالنا كلنا هسهس في دماغنا لأنها كانت ولا زالت الوجه القبيح المباشر للنظام ... يعني لما تيجي تخبط فيه هتخبط في العسكري أو الظابط ... لو كاره مبارك أو حد من وزراءه هتبص للنظام كله من خلال وزارة الداخلية .

-        والثورات العربية اللي قامت إصطدمت كلها بالداخلية في الأول ... وطبعا أنا عارف إن ده الطبيعي لأنها هي اللي في الشارع وهي اللي في الوش وهي اللي أكتر حد بيقرف الناس بشكل مباشر ... ومبنكرش إن في تار بايت بينها وبين كل بيت في مصر سواء إهانة أو ظلم أو قتل أو رشوة أو أو أو ..... لكن الداخلية ليست هي الأهم لأن :

-        لأن الداخلية هي الغطاء الخارجي للنظام وهي بشرها وفسادها الواضح المباشر تجعلك مشغول عن محاربة الفساد المالي والصحي والتعليمي وغيرهم .

-        لأن طول ما إنت مشغول في الصراع مع الداخلية عمرك ما هتفوق لوزير الصحة اللي مفتحش ولا مستشفي جديدة ولا سهل إجراءات تعيين الأطباء ولا طلع مشروع قانون صحي ... مع إن المرضي كتير والأطباء مش لاقيين شغل .

-        لأنك وإنت مشغول في الصراع مع الداخلية عمرك ما هتسأل وزير المالية هو ليه رايح يجيب 3 مليار من صندوق النقد الدولي وإحنا هنا لو كسبنا قضية مدينتي هيرجع للدولة 300 مليار جنيه ... وده مثال بسيط للموجود في مصر ونقدر نسد بيه العجز .

-        لأنك وإنت مشغول في الصراع مع الداخلية مش هتسأل وزير التربية والتعليم ليه 1- مشافش حل في قضية مدرسين بيتخرجوا تربية إعدادي وبيدرسوا إبتدائي . 
2- مدرسين مواد بيدرسوا مواد تانية غير تخصصاتهم 
3- أطفال مش متعلمة بسبب الفقر وهو مطلعش بولا مشروع ولا قانون يحل بيه ده ... مع إن عندنا خريجين تربية وتجارة بيشتغلوا كاشير سوبر ماركت لأن مفيش تعيين في مدارس حكومة ولا خاصة .
4-مش هتفوق تسأله عمل إيه أو جهز إيه كمقررات جديدة تتطبق من السنة الجاية تواكب تطور التعليم في العالم وإحتياجات السوق ؟
5- ومش هتبقي فاضي تسأله عمل إيه أو جهز إيه ك كورسات نفسية وكورسات تواصل للمدرسين عشان يدرسوها في الأجازة فا يقدروا يتعاملوا مع الطالب بشكل أفضل بداية من السنة الجديدة .

-        عشان وإنت مهتم بالصراع مع وزارة الداخلية مش هتسأل وزير الأثار زاهي حواس ليه سافر أمريكا يدي 5 محاضرات في السياحة لمصر ودي أصلا مش إختصاصه وكمان لو سألت مرشد سياحي هيقولك إن الأمريكان مش هما أكتر جنسية بتيجي مصر ومش هما اللي قايمة عليهم السياحة .

-        عشان وإنت مشغول في الصراع مع الداخلية هتنسي كل دول وتفضل تحارب في جزء واحد بس من النظام ... والنظام أصلا هدفه إنك تبقي مشغول في الصراع مع الجزء ده عشان يعك هو براحته في باقي الأجزاء .

-        عشان وإنت عمال تعمل مظاهرات قدام الداخلية مش هتفكر تعمل مظاهرة قدام وزارة المالية تندد بالسياسات الغريبة اللي ماشيين عليها واللي هتأدي لمقتل الكثيرين جوعا وفقرا برضه زيها زي الداخلية .

-        عشان وإنت مشغول في الصراع مع وزارة الداخلية هتنسي تسأل وزير التنمية ووزير الإسكان عملوا إيه لمعتصمين ماسبيرو اللي معندهمش حتة يباتوا فيها .

-        عشان وإنت مشغول بالصراع مع الداخلية هتنسي حاجة إسمها وزارة البيئة أنا لحد دلوقتي مش عارف الصراحة إيه لازمتها أو هي عملت إيه هي ووزيرها (ماجد جورج ) اللي هو هو قبل الثورة وبعد الثورة وأنا مش عارف قاعد ليه ؟ لإنجازاته مثلا ؟ 

-        عشان وإنت مشغول في الصراع مع الداخلية هتفاجأ إن مهما ظباط إتحاكموا وعساكر إتسجنوا هيجيلك مكانهم عساكر وظباط بنفس النوعية والفكر نتيجة إن مفيش تعليم ولا صحة ولا حياة كريمة ... وهتقعد تلف في نفس الدايرة .

-        أنا مش واقع في نظرية المؤامرة للدرجادي لكن بفكر إيه اللي يمنع إن تكون الأحداث الأخيرة من الداخلية مفتعلة بقصد الإلهاء عن أمور أهم ؟؟؟؟

-        أنا مبقولش نسيب الداخلية تمرمط فينا وتبهدل فينا ونسكت ... لكن بقول نبقي علي درجة من الوعي إن الموضوع اكبر شوية من وزارة واحدة ... أو علي الأقل نقسم نفسنا كشعب في الضغط علي باقي الوزارات عشان تشتغل .

-        الداخلية هي وجه قبيح من أوجه النظام ولأنها هي أول شئ تصطدم به تريد أن تغيره ولكن لن تغيره إلا إذا غيرت أساس النظام .

-        أرجوكم محدش يقولي دي حكومة إنتقالية .... هي حكومة إنتقالية لكن هي حاليا يا إما قاعدة وبتشتغل وبتاخد قرارات هتودينا في داهية وترجعنا أوحش من الأول أو سلبيين مبيعملوش حاجة وإسمهم وزراء ومسئولين .... طب يحطوا خطط ... يحطوا مشاريع ... يعملوا أي حاجة ترضي ربنا .

- أرجوكم لازم نكون أذكي في ضغطنا علي جهات الفساد ولازم ندرك إن الداخلية مش هي أهم حاجة لازم نضغط لتغييرها حاليا.

هناك تعليقان (2):