السبت، 18 يونيو 2011

كلمة في سرك يا باشا




-        هو إنت فاكر يا باشا إن الإعتصام فسحة ؟ هو إنت فاكر إنه سهل قوي الواحد ينزل في عز الحر في يوم أجازته ويتظاهر ؟
-        العامل المصري اللي طول عمره بيشتغل بأقل الإمكانيات وفي أقسي الظروف وبأقل مقابل وبأقل حقوق خلاص جاب أخره وطق ... إعتصامه مش دلع ... لو كان عايز يتدلع يا باشا كان غاب وقعد في بيتهم قدام مروحته – لأنه طبعا معندهوش تكييف – و جاب بطيخة وقزازة ببس وقعد مع عياله .
-        العامل والموظف والمواطن المصري لو شايف إن في تغيير حقيقي مكانش نزل طالب بيه في إعتصام ومظاهرة .
-        العامل والموظف المصري لو كان شايف إن في وسيلة تانية لتحقيق مطالبه كان عملها ومكنش وجع دماغك يا باشا بالمظاهرة .
-        العامل المصري اللي بيعتصم يا باشا مش نازل يعيط ويطالب بحقوق وخلاص ... عارف يا باشا لو نزلت وإتفاهمت معاه عمره ما هيرفع إيده عليك ويضربك ، بالعكس ... هتلاقيه بيقدملك حل واقعي جدا ومنطقي يرضي كل الأطراف ... لكن إحنا يا باشا عارفين إنك متقدرش تستغني عن الفاكس وعندك مشاكل ياما .
-        هو إنت يا باشا مش كنت في المظاهرة معانا ؟ مش كنت بتهتف بسقوط النظام عشان كنت حاسس بالظلم ؟ بزمتك يا باشا كنت بتقول إيه ساعتها قبل التنحي لما كانو بيتهموك بالعمالة وإنك عايز تخرب مصالح البلد ؟ إحساسك كان إيه وإنت بتتوصف بإنك مجرم ؟ هو ده يا باشا إحساس العامل والمواطن اللي قلت عليه هيتحبس وهيبقي مجرم لأنه طالب بحقه .
-        باشا ... إشمعنا شادد حيلك قوي علي اللي بيطالوا بحقهم في مظاهرة وإعتصام ومش شادد حيلك علي اللي بيسرقوا عربيات الدوا في طريق الصعيد وعلي تجار السوق السودا اللي بيستغلوا غياب الرقابة ومعليين أسعار السلع ؟ أه صحيح ... ما إنت مبتنزلش السوق يا باشا ... بس جرب إنزل السوق وإسأل الناس .
-        لو إنت شايف إن الناس دي مبيعجبهاش العجب ومهما يا عيني تتعب نفسك في قرارات وخطط برضه مش راضيين عنها ، ما تفكر كدة يا باشا تنزل وسطهم وقلهم تعالوا إنتوا إعملوا قواعد وطريقة لتنظيم عملكم وحقوقكم ؟ ما تجرب يا باشا ولو منفعتش الطريقة دي يبقي أديك عداك العيب وعملت كل الطرق اللي ترضي بيها الشعب الغلباوي ده .
-        باشا لو مش عايز تنزل الشارع و خايف من الناس قوي يبقي أكيد إنت عاملهم حاجة غلط ... أذيهم جامد وخايف من رد فعلهم .
-        باشا لو مش عايز الناس تكرهك متجرمش طريقة مطالبتهم بحقوقهم ... ولو مش عاجباك الطريقة إعملهم طريقة تانية وسرع النتايج بتاعتها عشان الناس تلتزم بيها  ومتوجعش دماغك تاني بالإعتصام والمظاهرة .
-        كلمة في سرك يا باشا من مصلحتك تكسب الشعب لأن أديك شفت الشعب لما بيغضب بيعمل إيه ... وأديك شفت إنه صاحب البلد ... وأديك شفت إنه مبقاش يخاف ... إخزي الشيطان يا باشا وإرجع في القرار ده وطلع الغلابة اللي جوة ... وعفا الله عما سلف .
-        كلمة تاني في سرك يا باشا لو مكنتش خدت بالك منها يبقي لامؤاخذة متعرفش الشعب ده وبالتالي مينفعش تحكمه ... الشعب اللي شاف ناس منه بتموت وبتتحبس بسبب مطالبتها بحقوقها هيقول خلاص يا روح ما بعدك روح ، وكدة ميت كدة ميت ومش هيفرق معاه يتحبس ولا يموت ... ما أنا قلتلك قبل كدة إنه لو كمل كدة هو عارف إنه ميت بالحيا .
-        كلمة تالتة في سرك يا باشا ... من خلال الكام شهر اللي فاتوا الشعب عرف اللي فيها وهو إن الحكومة مبتجيش غير بالإعتصام ... الصراحة إنتوا ورطتوا نفسكوا في الموضوع ده .... شوفولكوا حل بقي .
-        إحنا أسفين إن إحنا شغلناك وأخدنا من وقتك يا باشا .

هناك تعليق واحد: