- قلة أدب

    هو اللي يبوس حد في رجله هيروح النار ؟  

-       مامتك شافتك وأنتي جاية ؟

-       لأ .. هي أصلا بتطبخ

-       طابخين أيه ؟

-       بسلة ...

-       مبحبش البسلة ...

-       ولا أنا ... بس بحب أفصصها

-       ماما قالتلي أني هروح النار عشان برمي البسلة عالناس من البلكونة

-       أنا ماما قالتلي هروح النار بعد ما كنت بلعب معاك أخر مرة ...

-       عشان جيتي من وراها ؟

-       لأ ... عشان أنت بوستني في رجلي

-       مش رجلك كانت واجعاكي ؟

-       أه ..

-       وخفت ؟

-       لأ ... ماما قالتلي أنها هتفضل واجعاني عشان لعبت معاك وخليتك تبوسني ... وقالتلي هروح النار

-       هو اللي يبوس حد في رجله هيروح النار ؟

-       مش عارفة بس ماما قالت كدة

-       هي النار دي فيها أيه ؟

-       مش عارفة ... بس أنا مش عايزة أروح

-       خلاص لو وقعتي تاني مش هبوسك

-       ماشي

-       طب تعالي نلعب

-       نلعب أيه ؟

-       بوليس ....

-       لأ مبحبش ألعب لعب الولاد

-       أنتي غلسة

-       وأنت حمار

-       لو شتمتيني تاني هضربك بالقلم علي وشك

-       ما أنت اللي أبتديت

-       أنا أشتمك أنتي متشتمينيش

-       أشمعنا يعني ؟

-       الولد يشتم البنت متشتمش ... بابا قالي كدة

-       خلاص متشتمش أنت الأول

-       ما أنتي اللي مش راضية تلعبي بوليس .. وبعدين سيبي العروسة دي مش كل ما تيجي تجيبيها معاكي

-       وأنت مالك ... عروستي

-       طب هاتيها كدة ...

-       - لأ أوعاااااااااا ... يا ماماااااااااااا

-       لو عيطتي مامتك هتعرف أنك هنا وبتلعبي معايا وهتضربك أكتر

-       سيب عروستييييييييييي

-       أيه ده ؟

-       مش عارفة ... أنا خايفة ؟

-       النور قطع كمان

-       أنا خايفة قوي

-       ووووووو ...

-       بس بقاااااا ....

-       أنا العفرييييييت ...

-       بس بقي بخاااف ....

-       يا سارة .... أنتي يا بت يا سارة ....

-       أمك بتنده عليكي ...

-       متقولهاش أني هنا ... لو عرفت هتضربني بالشبشب زي المرة اللي فاتت

-       طب حاسبي

-       أنا عايزة انزل بس خايفة من الضلمة ...

-       متخافيش ... أنا هنزلك

-       بس عايزة عروستي الأول

-       أنتي يا بت يا سارة ... رحتي فين يا منيلة ؟؟؟

-       مش شايفة العروسة ...

-       أنزلي من غيرها

-       لأ ... هتبرد

-       طب أستني ... تعالي ندور في الأرض ... وطي و وأقعدي حسسي في الأرض لغاية ما نلاقيها ...

-       ماشي ...

-       أيييي

-       أييييي ... راسك ناشفة قوي

-       هاهاهاهاااااا... ماما دايما تقولي أنت دماغك ناشفة ... أهه .. لقيت العروسة ... خدي

-       شكرا .... هتنزلني ؟

-       أه ... هاتي أيدك

-       يا سارة .... راحت فين دي ؟

-       علي مهلك ... أنا حافظ طريق السلم ...

-       ماشي ...

-       بصي ... وطي صوتك ... وأنا هقلع الشبشب عشان أمك متحسش أن في حد نازل معاكي

-       يا سارة ... أنتي يا بت

-       كلميها عشان تعرف أنك نازلة وأنا مش هتكلم ... ولما توصليلها أدخلي علي طول وأنا هتسحب وأنزل علي بيتنا ... وبكرة نتقابل أو لما النور ييجي

-       ماشي ....

-       أنتي يا بت !!! غورتي فين ؟؟؟

-       .....

-       أيوة يا ماما ؟

-       أنتي فين يا زفتة الطين ؟ مش بنادي عليكي من بدري ؟؟؟ وطالعة فوق في الضلمة تعملي أيه ؟

-       كنت بجيب حاجة والنور قطع ...

-       طب تعالي هنا ... علي مهلك لا تقعي تنكسر رقبتك

-       حاضر ... جاية أهه

-       أموت وأعرف خبيتي الشمع فين ؟؟ يا بت أنا مش ميت مرة قلتلك تسيبي الحاجة مكانها ؟؟؟ انا حاطة الشمع في النملية عشان لما النور يقطع محتاسش ، بتوديه فين ؟؟

-       ....

-       هااا ... وصلتي ؟

-       أه .. أهه ...

-       تعالي ... مالك بتتنفضي كدة ليه ؟ أحسن ... عشان متطلعيش فوق السطوح تاني لوحدك ... أهه النور جه ... أيه ده ؟؟؟ بيعمل أيه معاكي ده ؟؟؟ وماسكين أيد بعض كمان ؟؟

-       ....

-       ....

-       يا بنت الكلب بتستعميني وطالعة مع الواد فوق السطوح في الضلمة ؟؟؟؟

-       أي ... أي ... يا ماما ...

-       موو لما يركبك ... خد هنا أنت كمان يا مقصوف الرقبة ... ماااشي ... وقالع الشبشب وبتتسحب ؟؟؟ أجري أنجر علي بيتكم ياكش تقع علي جدور رقبتك وأنت بتتنطط عالسلم زي القرود ... انا لي كلام تاني مع أمك ... وأنتي ... أنجري علي جوة حسابك معايا لما ييجي أبوكي ... عيال بايظة قليلة الأدب ... انا عارفة بتتعلموا قلة الأدب دي منين ؟؟؟