الأحد، 15 مايو 2011

الطريق إلي التحرير يوم 27 يبدأ بماسبيرو الان


روماني وشنودة وبيتر .. من ماسبيرو مش هتلاقوهم علي تويتر



نزلت ماسبيرو ... بغض النظر عن قناعاتي الشخصية في موضوع الإعتصام بتاع الأقباط إلا إني قررت أنزل أشوف إيه اللي بيحصل عشان زهقت من القنوات اللي بتجيب كوبري فاضي والقنوات اللي بتجيب نار والعة وناس بتموت ... نزلت أشوف الناس هناك إيه مطالبها وعايزين إيه بالظبط وناويين يمشو إمتي .

الناس هناك عاملين كردون وطوابير عشان يفتشوا الناس وهما داخلين زي ما كان بيحصل في التحرير ، لكن مشفتش هناك مسلمين كتير خالص ... يكاد يكون عددهم تشوف بنت محجبة بين كل 30 بنت ...الأعمار من كله ... بتخيل الناس نازلة من بيوتها أب وأم وعيالهم وأصحاب عيالهم والرضع والعواجيز .

السمة المميزة الصلبان في كل حتة من كل حجم ومرسومة عالقورة وعالإيد و عالخد ... منظر متشوفهوش غير في الموالد ... صور مارمينا ومارجرجس والعذراء ... عيش وشاي وجبنة نستو وكشري ... مارتينا أبانوب بيتر عماد بولا مارينا يوستينا .

هتافات من المنصة عن ربنا موجود ... يا رب يا رب ... إرفع إيدك فوق الصليب أهه ... ومقدرتش أمسك نفسي من الضحك لما طلع واحد من شباك في ماسبيرو راح كل الناس باصة عليه وقعدو يشاورو عليه ويقول : الإعلام الفاسد أهه ...الإعلام الفاسد أهه ... وهو متنح لحد ما ادرك راح داخل تاني .

بعد شوية الهتافات بقت عايزينها تبقي مدنية عايزينها تبقي مدنية ... في يفط متعلقة مكتوب عليها (نرفض إهانة البابا من السلفيين والإخوان ) و ( نريدها مدنية لا إسلامية ولا عسكرية ) .

كنت عايز أتكلم مع أي حد ... إتكلمت مع 3 شباب ... بيتر وروماني وشنودة ... التلاتة دول إستحالة تلاقوهم علي تويتر أو فيس بوك أو أي حتة ... ممكن تكون شفت واحد منهم في محل حدايد وبويات زي بيتر أو سباك زي روماني ... قصدت أتكلم مع الناس دي عشان دول اللي بيمثلوا 95 % من المعتصمين هناك ... اللي بيقولو علي نفسهم مثقفين زي حالاتي مرطرطين عالفيس بوك وتويتر ومحسسين نفسهم ومحسسينكم إن الدنيا صعبة بات إت إز أوكاي .

بدأت مع واحد كان ماشي شايل صليب وقلتله : إزيك ؟ عامل إيه ؟ أنا لاري بشتغل مؤلف وبكتب مقالات وعايز أسألك علي كام حاجة ... هو إنت هنا بتعمل إيه وقاعد لحد إمتي ؟
طبعا بمجرد ما إتكلمت معاه لقيت ناس إتلمت علينا كتير منهم اللي شاكك في ومنهم اللي عايز يسمع ومنهم اللي جه يقول ويتكلم مع إنه مسمعش أنا سألت إيه ، والغلبان اللي أنا سألته بقي مش عارف يرد من كتر الناس اللي بتتكلم ... الناس كبست علينا وواحد كان باصصلي فعلا بإرتياب لدرجة إني قلتله أنا مسيحي زيك وطلعت البطاقة وريتهالهم لكن فضلو شاكين في .

الواد اللي في النص اللي سألته أغلب من الغلب بأمانة ، شايل صليب وكل مطالبه في الحياة إن محدش يعاكس أخته لما تنزل وقاللي : هو إنت مش مسيحي زينا ؟ جاي تسأل علي طلباتنا ليه ؟ ماهي معروفة في كل حتة .
قلتله : أنا عايز أوصل صوتك قوللي قانون عايز تطلبه... قللي واحد إتنين تلاتة متقولش كلام في الهواء
الولد : أنا معرفش .. بس هما قفلولنا الكنايس ومفيش بنت مسيحية مبتتعاكسش
قلتله : ما في بنات مسلمين برضه بتتعاكس
راح واحد غريب دخل في الحوار فجأة وشه لزج قاللي : أنا شفتك بتلم الناس حواليك في كذا حتة وبتقولهم كلام غريب ... إنت شكلك مش عاجبني ... إنت شكلك يهوذا

طبعا أنا سمعت يهوذا إستغربت قلتله أنا لاري مش يهوذا ... قاللي لأ تلاقيك يهوذا من ضمن كذا يهوذا باعو القضية بتاعة المسيحيين علي مر العصور

يا عم يهديك يرضيك أنا جاي أسأل علي طلبات الناس وعايزها تبقي محددة عشان أفهمها ... الحمد لله ربنا نجدني بكام واحد شخطو فيه وقالوله : إيه اللي بتقوله ده ؟ لاري معملش حاجة هو بيسأل ومطلبش منك حاجة وعيب ... المهم الموضوع إتلم والراجل كان شكله وحش والصراحة فرحت فيه .

أنا بقول الجزء ده ليه ؟ عشان تعرفو إن الناس هناك عنده إحساس رهيب بالقلق وتوجس ... نفس إحساسنا بعد معركة الجمل ..... خيااااااااااااااااااااااااااااااانة ... إيه اللي حصلنا ده ... إحنا إتضربنا ومعملناش حاجة لحد .

المهم الواداللي سألته هرب لأنه مكانش عارف يرد ولا يقول نقط في مطالبه ، لكن كل اللي قدرت أطلع بيه من حديثه إن مطالبه إن الكنيسة متتقفلش وأخته متتخطفش وعايز يتطمن عليها وهو في الشغل ... الراجل من بساطته مش عارف يقول نقط في المطالب ...عايز بس يبقي متطمن إن بيته أمن وبيصلي في كنيسة متتقفلش ... لا ليه في قانون ولا في مواد ... ولما سألته تعرف إيه هي المادة التانية كام واحد حواليه غششه إنها بتاعت الدولة الإسلامية .

ربنا كرمني بتلاتة بقي اللي هما بيتر وروماني وشنودة وسألتهم نفس الأسئلة : مطالبك إيه ؟ قاعد لحد إمتي ؟

وإذ بالتلاتة يرددو نفس الكلام : إخواتنا البنات بتتخطف .... الكنايس بتتقفل ... المسلمين بيكرهونا .

بيتر (شغال في المقاولات ) قال : أنا من عزبة النخل ... يوم الجمعة اللي فاتت حبوا يزلونا راحو جابو ولد مسيحي بقي مسلم وقالو هيركبوه حصان وهيلفو بيه عزبة النخل كلها عشان يزفوه ويزلونا .... لما جت تهديدات للكنايس راح ناس جابت فرادي ( فرادي جمع فرد اللي هو المسدس ) ووقفوا يحرسو الكنيسة ... راح الجيش كبس عليهم وأخد منهم الفرادي وحبس 27 واحد منهم بتهمة حيازة سلاح ... طب مخدوش ليه من السلفيين مع إن معروف إن عندهم سلاح ؟ إحنا عايزين القانون يتطبق عالكل .... أنا لو محدش جابلي حقي هطلب مساعدة من برة .... ما هو حكومتي مبتحمينيش أشوف حكومة غيرها تحميني ... عايز يبقي في قائد في الجيش مسيحي وفي الشرطة ولما أتقدم لوظيفة محدش يرفضني عشان مسيحي .. وأختي وأمي محدش يخطفهم ولا يعاكسهم ... تعال عندنا عزبة النخل وإنت تشوف كام مسيحية إتخطفت ... فين بناتنا ؟

شنودة : أنا مش عايز حد يتدخل في البلد من برة ... أصلهم هيخربوها يا عم ... هي الحكومة المفروض تجيبلنا حقنا ... حق الناس اللي ماتت في نجع حمادي وحق الناس اللي إتقتلت في القطر في سمالوط وحق الناس اللي في أطفيح وفي إمبابة ... ألا ما سمعنا عن واحد منهم إتحاكم ولا حصله حاجة ... إحنا عايزين العدل عايزين الكل متساوي ... بس أنا مش عايز تدخل من برة مصر ... عايزين حقوقنا .. إحنا لينا حقوق كتير والكل عارفها ... مش عايزين كنايس تتهد عايزين في كل حي كنيسة ... أنا بموت برة يبقي أموت هنا وأتشاهد وأروح السما أحسن ... يا عم مسلمين بيحبونا إيه ؟ فكك من الكلام ده ... لا لا لا لا متصدقهمش ... أنا هقلك ... أنا شغال مع خمسين واحد منهم قالولي ولا تسوا ضافر واحد مننا ... يحبونا إيه يا جدع ؟

روماني ( سباك ) كان جايب أخره ومتعصب بس عينيه مدمعة : إنت مبتركبش متروهات ؟ مبتسمعش بيقولو إيه في الخطب بتاعتهم اللي بيشغلوها عالموبايلات في المترو ؟ مبتسمعش الماكروفونات بتاعت الجوامع ؟ البنت المسيحية بتبقي ماشية في الشارع معروفة إنها مسيحية وبتتعاكس عشان مسيحية وبتغتصب وبتتخطف ومحدش بيقدر يفتح بقه ... إسكت الواحد جاب أخره ... إنت مش مسيحي ولا إيه ؟ جاي تسأل ليه مش بتشوف بعنيك ؟ ... أنا عايز اللي عمل كل ده يتحاكم وأشوفه قدامي بيتحبس ... لأ ... الإسلاميين ميحكموش البلد ...لو حكمو البلد هيقطعو إيد اللي بيسرق ويحجبوا بناتنا .... هما ليه كل ما يقولك المسيحيين كام مليون 10 ولا 20 يقولك لأ هما أقل من كدة ؟ عايزين يخفونا ليه ؟ عايزين يقولو إننا مش موجودين في البلد ؟ ... أنا عايز الروس تتساوي ... كله يبقي ليه حقوقه .

طبعا أنا بالكام كتاب اللي قريتهم في حياتي مقدرش أنفي مشاعر الناس دي وأقوله عيب خليك متحضر ومتعملش كدة ... علي الأقل مش دلوقتي ... فككوا بقي من إنعدام الوعي والكلام المجعلص بتاعنا إحنا يا مثقفين وخلينا نعترف ...الناس دي في منتهي البساطة .. واللي قالوه ده حقيقي تماما لو مش مصدقه إنزل وشوفهم وإسمعهم .... الناس دي مجروحة جدا وطالبين العون من ربنا ... و ربنا مش هيسيبهم ... طلباتهم عاطفية وبسيطة ومن حقهم ... ومن بساطتها مش عارفين يصيغوها في شكل قانون أو مادة يطالبو بيها ... وقبل ما نعمل دولة الناس دي محتاجة مصالحة .

أنا مش بقترح حلول لمشاكلهم لأن مبارك وعصابته سابو إرث من المشاكل محتاج حكومة لولبية تحله لكن .... في مسئولية علي كل مسلم معتدل يقرا المقال ده ... الناس دي مجروحة من ناس متشددين بيتسقوا الكراهية بإسم نصرة الدين ... أنا أصحابي المسلمين مش كدة ... لكن في ناس فعلا بتعرف تكره كويس قوي وتحسس اللي حواليها بالقهر ... الساحة الان في ماسبيرو وفي كل حي متروكة فارغة يا يملاها متشددين يزرعو الكراهية أكتر يا يملاها ناس مسلمين علي حق و بيحبوا بجد من قلبهم زي أصحاب لي كتير ... هقولك علي حاجة ... إنت مسلم ... جرب روح ماسبيرو وإمسك واحد مسيحي شايل صليب وقوله أنا مسلم وبحبك ... إعمل في اللي إنت عايزه لو المسيحي ده منهارش من العياط بسبب اللي إنت عملته ده ... هما مجروحين من مسلمين أنا واثق إن إنتو عارفينهم وإنتو مختلفين عنهم ... إثبتوا حبكم ليهم مش بصفحة عالفيس بوك لأن بتوع إمبابة والخصوص وعزبة النخل وغيرها كتير من المناطق مبيشوفوش الحاجات دي ... الطريق إلي التحرير يوم 27 بل الطريق إلي مصر المتقدمة الديموقراطية يبدأ بالمرور من ماسبيرو ... وسأظل علي مبدأي .. مش هنزل أطالب بحقوق أقباط غير لما يبقي في هناك مسلمين أكتر .

لاري نبيل

هناك 6 تعليقات:

  1. you should post it on facebook ya Lary

    ردحذف
  2. very true !!! very good step from u

    ردحذف
  3. كلامك صح لكن المسلمين المعتدلين اللي اتربينا معاهم قلوا قوي وصوتهم غير مسموع جنب الاصوات المتشدده اللي هاتتفرض عليهم وهما خايفين منها
    الحل في طرح المواضيع بصدق في التلفزيون علشان تتغير الثقافه السائده في المجتمع والناس اللي في كي جي وان ثقافه تفهم الامور صح والناس اللي بتكدب معتمده علي انها بتسوق العامه بأسم المطلق تتكشف خيبتها وقله حجتها وانعدام المنطق في حوارها وتفشي الاكاذيب وقلب الحقائق في طرحها السياسي .هما لو سابو المثقفين يواجهوا الناس دي في التلفزيون العام لسقطوا جميعا بأفكارهم المتخلفه . ربنا موجود .

    ردحذف
  4. لاري انت هايل. انا مسلم بس بصراحه لانزلت التحرير ولا ماسبيرو بس اختي نزلت ماسبيرو ورجعت قالتلي نفس الكلام الناس هناك غلابة قوي وماكانوش مصدقين ان في مسلمين واقفين معاهم ولما سمعوا الشيخ بيتكلم من القرءان ان المسيحيين اقرب ناس للمسلمين ماكانوش مصدقين من كتر الجهل اللي سمعوة من جهلاء ومدعين. امثلة مالهاش حصر من الكتاب والسنة والتاريخ والحاضر بس للاسف الساحة متروكة لاجهل الناس تكون اعلي الاصوات. انا ايميلي miomar74@gmail.com ياريت لو وقتك يسمح نبقي نتكلم اكتر

    ردحذف
  5. انا كان نفسى اسال بس سؤال ليه الناس الى فى ماسبيرو متروحش تتظاهر فى التحرير..ثورة مصر لما اتعملت اتعملت فى التحرير..ليه ديما بنقفل على نفسنا لدرجة ان ماسبيرو بقى معروف انه مكان التظاهر بتاع المسيحين فقط,,انا ليا اصحاب كتييير بيقولولى روحوا التحرير واحنا هنضم صوتنا لصوتكوا لكن طول ما انت منغلقين على نفسكوا عمرنا ما هنقدر ندخل وسطكوا

    ردحذف
  6. كتبت رد كبير وحصل ايرور و راح .. هاكتبه تانى
    بس المهم إنى حصل معايا بالظبط اللى انت كتبته
    قابلت ناس كتير بتتعالى على مطالب الفئة البسيطة حالا وعقلا دى بدون ما يقدموا حلول غير - ياى ، دى مش طريقة إعتراض ... شكلهم وريحتهم وحشة اوى ... وانا أقول لهم الله يرحم
    المهم ... النس دى بسيطة لكن لها حقوق
    طائفيين النزعة -وهنا المقصود ان أمانهم فى هويتهم الدينية - لكن برضو لهم حقوق
    الناس دى مظلومة فى بلدها ومش حاسة بالأمان لإن كل مرة بنضحك عليهم بجلسة صلح عرفية
    الناس دى ماتعرفش يعنى ايه دولة قانون - لكن تعرف ان اللى بيغلط فى حقها مش بيتجازى ...

    ردحذف