الخميس، 17 فبراير 2011

ميهمنيش

- ميهمنيش غير مصر .


- ميهمنيش وائل غنيم مصري ولا يهودي ولا أمريكاني ولا بيشتغل في شركة يهودية ولا مصرية ولا صهيونية ولا أي جن أزرق ... يهمني إن دي ثورة المصريين مش ثورته وكانت بتنادي بطلبات المصريين ونجحت .

- ميهمنيش شبكة رصد ولا الجزيرة ولا اليوم السابع خونة ولا مش خونة .... حرامية البلد معروفين والشعب مش محتاج حد يقوله عليهم ... يهمني منحاسبش حد دلوقتي ويهمني ناخد بالنا مين ميسرقناش تاني .

- ميهمنيش مين يحط الدستور مسيحي ولا مسلم ولا هندوسي .... يهمني يكون في مساواة في الدستور ومساواة علي أرض الواقع .

- ميهمنيش مين كان مع الثورة ومين كان ضد الثورة .... يهمني مين ناوي يبني البلد دي من قلبه .

- ميهمنيش مبادرات وجروبات وصفحات وإعتذارات ونكت وقفشات عالفيسبوك .... يهمني أنزل الشارع دلوقتي أنضف وألتزم بالقواعد وأقف في وش الفساد .

- ميهمنيش ليبيا ولا البحرين ولا الجزائر ولا فلسطين ولا رفح ولا غزة ولا اليمن .... يهمني أحط كل تركيزي في بلدي دلوقتي .

ميهمنيش غير مصر.

ليست هناك تعليقات:

إرسال تعليق