الخميس، 24 فبراير، 2011

مراحل فقع مرارة حضرتك

ويبقي السؤال ... مين هما اللي  ( بيقولوا ) ؟ 


ما أسهل أن أقول
خبر عاجل : إغتيال الرئيس السابق مبارك علي يد عاطل بإمبابة
وحضرتك بسلامتك تجري علي الخبر متوقعا أنه خبر الموسم و تترك كباية الشاي وتناديك الست والدتك فتقول لها ( إستني ... إستني ) .
و تفاجأ حينما تتابع تفاصيل الخبر أني أتحفك بالقول :
أثناء مرور إبن خالت إبن أختي بإمبابة سمع أن هناك مسئول كبير يمر هناك ، وهناك تجمهر شعبي عليه ، وفوجئ بوجود سيارة سوداء فارهة عليها علم مصر وزجاجها فاميه (عاكس) وفي فزبتين واقفين قدامها وتبدوا كسيارات الرؤسات ، وفجأة سمع صوت طلق نار وإمرأة تصرخ ، وفر إبن خالت إبن أختي هاربا خوفا علي حياته ، ويعتقد أن الرئيس مبارك هو من كان هناك والرصاص أطلقه أكيد أحد العاطلين المتضررين من النظام السابق ، والمرأة التي صرخت صرحت بسبب الفزع وأنها كانت من مؤيدين الرئيس الراحل وهي من دعته لهذا الحفل الشعبي توديعا له ....
( طبعا في المرحلة دي مرارة حضرتك بتكون إتفقعت خلاص لكن أنا مش بسيبك وبقولك عشان أقضي علي أي أمل في إنك تحتفظ بمرارتك سليمة )
لم يتم التأكد من هذه الأنباء

نوعية الأخبار دي هي أكتر حاجة هتلاقيها علي الفيس بوك وتويتر اليومين دول وأخر خبر سمعته من دول كان عنوانه بيقول ( العادلي يتعرض للتحرش الجنسي في سجن طره )

المصيبة أن هناك أخبار كثيرة تبدأ بجملة : خبر غير مؤكد
طب لو غير مؤكد بتقولوه ليه ؟ وليه بنقراه ؟
ويستمر السؤال الأبدي الأزلي .... مين دول اللي بيقولوا ؟

المرحلة الحرجة اللي إحنا فيها مش مستحملة تشتيت وإشاعات عالفاضي ... أرجوكم إحترموا عقولكم ... في أخبار مش حقيقية ومش مقبولة ومش معقولة والغريب إن برضه بنعملها
share

وبما إننا بقي كل شوية بيطلعلنا حد يتكلم بأسمنا كلنا ويضمنا كلنا ويعمل تاج لينا غصب عننا للبيدج اللي بيعملها وبيكون إسمها علي غرار : كلنا حسني مبارك ... كلنا وائل غنيم ... كلنا مع الليبين ... كلنا هننزل مصطفي محمود ... كلنا هنقاطع فلان ... كلنا هنحب فلان ... كلنا إيد واحدة يا بهجت .... والغريب برضه إن محدش بياخد رأينا .... المهم
أنا قررت أركب الموجة وأطبق الأجندة بتاعتي بعد ما أكلت وجبتي من كنتاكي وأعمل بيدج لينا كلنا إسمها

( كلنا هنحترم عقلنا ومش هنعمل شير أو لايك غير للي يدخل دماغنا ويكون من مصادر موثوقة )

وبرضه لو حد عرف مين اللي (بيقولوا) يقولي هما مين عشان عايزهم في كلمة

هناك تعليقان (2):

  1. صح جدا , وعلى رأى مدحت شلبى متقولش اية اللى اتقال قول مين اللى قال ,, انا كمان تعبت من اللى بيقولوا واللى بيتقال

    ردحذف
  2. كلنا مدحت شلبي .. :))

    ردحذف